Kur Pierre Poilievre, lider i Partisë Konservatore të Kanadasë, ishte në vitin e dytë në Universitetin e Calgary-t, ai shkroi një ese prej 2500 fjalësh për atë që do të bënte nëse do të bëhej kryeministër.
Eseja, që i solli një çmim prej 10,000 dollarësh dhe një takim me kryeministrin e atëhershëm Jean Chrétien, fliste për rëndësinë e lirisë dhe paraqiste një agjendë populiste me taksa të ulëta, shumë e ngjashme me manifestin e tij aktual.
Qeveria, sipas tij, duhet të përpiqet "vazhdimisht të gjejë mënyra për të mos i penguar këto liri".
Poilievre, 45 vjeç, lider i opozitës në Kanada, për muaj të tërë përfitoi nga një valë populizmi anti-elitar që ndihmoi në largimin e Justin Trudeau-së, i cili ishte bërë gjithnjë e më i papëlqyeshëm.
Zëvendësuesi i tij, Mark Carney, ish-guvernator i Bankës së Anglisë dhe Bankës së Kanadasë, shpalli zgjedhje të parakohshme muajin e kaluar.
Fillimisht, kandidati liberal fitoi simpatinë e publikut, pasi u perceptua si dikush që u rezistoi "ngacmimeve" të Donald Trump ndaj Kanadasë.
Ky ishte një ndryshim i madh nga Trudeau, të cilin presidenti amerikan e quante "Guvernator" dhe sugjeronte shpesh që Kanadaja të bëhej "shteti i 51-të" i SHBA-së.
Në janar, një sondazh i Nanos tregonte Partinë Liberale 27 pikë pas Konservatorëve (47% me 20%).
Por në sondazhin më të fundit të përfunduar më 23 prill, liberalët udhëheqin me 4 pikë. Sondazhi i janarit kishte një gabim statistikor prej 3.1%, ndërsa ky i fundit prej 2.7%.
Agjencia tjetër e sondazheve, Angus Reid, tha këtë javë: "Aktualisht, liberalët federalë dhe Carney kanë një epërsi prej pesë pikësh ndaj konservatorëve (44% me 39%), pavarësisht dy debateve mes liderëve, më shumë se dy milionë votuesve të hershëm, dhe faktit që dy nga tre partitë (përveç konservatorëve) kanë publikuar platforma të detajuara buxhetore."
"Trump është përfshirë në jetën tonë dhe ka përcaktuar pyetjen e zgjedhjeve," tha ish-kryeministri i Quebec-ut, Jean Charest, për Associated Press. "Ajo që ka bërë Trump është që ka hedhur dritë mbi atë se kush jemi."
Charest, vetë konservator, tha: "Po prisnim që Konservatorët të merrnin një shumicë dërrmuese. Sot, jemi në një realitet krejt tjetër."
Poilievre, i lindur nga një nënë beqare 16-vjeçare, u adoptua nga prindër frankofonë mësues dhe ka pasur gjithmonë qëndrime të djathta, duke e konsideruar Margaret Thatcher-in një nga heroinat e tij.
Ish-pedagogët e tij e përshkruajnë si një "konservator i pazbutshëm", që drejtonte klubin konservator përpara se të hynte në politikë si praktikant i ish-ministrit të imigracionit Jason Kenney.
Ai u bë deputet në vitin 2004 dhe mori postin e tij të parë në kabinet në vitin 2013 si ministër për reformën demokratike.
Por stili i tij i ashpër ka shkaktuar polemika. Në vitin 2008 u detyrua të kërkonte falje pas një interviste radiofonike ku vuri në dyshim nëse ia vlenin gjithë ato shpenzime që Kanadaja po bënte për kompensimin e të mbijetuarve të shkollave famëkeqe për popullsinë autoktone.
Poilievre mori drejtimin e Partisë Konservatore pas mbështetjes së fortë për 'Freedom Convoy' në janar 2022, një protestë e nisur nga shoferët e kamionëve kundër kufizimeve të pandemisë, që më pas u shndërrua në një lëvizje më të gjerë për 'liri'.
U zgjodh si lider në shtator të atij viti dhe është bërë figura më agresive e partisë, i njohur për sulmet e tij të shpeshta ndaj medias, Trudeau-së dhe Partisë Liberale.
Kandidati konservator me gjuhë të mprehtë krijoi shprehjen 'Justinflation' dhe dënoi 'woke-izmin' e kryer nga qeveria "radikale" liberale.
Njëherë ai ka thënë për Trudeau-në: "Nëse do të kishte lexuar romanin 1984, do ta kishte marrë si një manual udhëzues."
Vitin e kaluar, Poilievre u përjashtua nga Dhoma e Komunëve në Kanada për gjuhë jo të përshtatshme, pasi e quajti Trudeau-në një 'kryeministër i çmendur'.
Nëse zgjidhet, Poilievre do të anulojë taksën e karbonit të Trudeau-së, do të shkurtojë shpenzimet për të luftuar inflacionin dhe do të heqë kufizimet mbi ndërtimin.
Me gjithë sondazhet e paqëndrueshme, babai i martuar i dy fëmijëve mbetet një politikan popullor.
Një video ku ai ha një mollë me qetësi ndërsa i përgjigjet me sarkazëm pyetjeve të një gazetari të majtë mori 2.5 milionë shikime në X dhe u përshkrua si "udhëzues për shkatërrimin e gazetarëve woke".
Ndërkohë, një miting me moton "Kanadaja e para" këtë javë mblodhi mijëra vetë, me radhë që zgjateshin përtej ndërtesës.
Disa e kanë quajtur Poilievre-n "Donald Trump-i i Kanadasë" për qëndrimet e tij të forta ndaj emigracionit, ekonomisë dhe luftës kulturore.
Megjithatë, pas kritikave të Trump-it ndaj Kanadasë, mbështetësit e tij duken të etur për të shmangur krahasimet.
Mbetet për t'u parë nëse Amerika e Veriut është mjaftueshëm e madhe për të përballuar dy Donald Trump-a. / The Telegraph - Syri.net
© SYRI.net
Denonco
Merrni lajmet më të fundit nga SYRI.net në çdo moment dhe kudo që të jeni!
Vala e të nxehtit në Itali lë 5 të vdekur, 17 qytete në alarm të kuq
Trump: Irani po bën lëshime shumë të mëdha
Rubio: Grupi teknik për Iranin do të ritakohet javën e ardhshme