Partia politike Fronti i Veprimit Islamik, e lidhur me Vëllazërinë Myslimane në nivel rajonal, fitoi numrin më të madh të mandateve në zgjedhjet parlamentare të mbajtura vitin e kaluar, në një klimë protestash të gjera kundër Izraelit për shkak të luftës së tij me Hamasin. Megjithëse monarkia jordaneze e kishte ndaluar Vëllazërinë një dekadë më parë, një fraksion i saj u licencua zyrtarisht dhe Fronti i Veprimit Islamik u tolerua, ndonëse me kufizime të caktuara në aktivitetet e tij.

 

Pas shpalljes së ndalimit të ri, policia rrethoi dhe bastisi selinë e partisë, duke sekuestruar disa kuti me dokumente. Ministria e Brendshme deklaroi se Vëllazëria Myslimane tashmë konsiderohet si një organizatë e paligjshme, duke ndaluar çdo aktivitet politik të lidhur me të dhe duke urdhëruar mbylljen e zyrave të saj. Sipas ministrisë, do të përshpejtohen edhe përpjekjet për konfiskimin e pasurive të grupit.

 

“Është vërtetuar se anëtarët e këtij grupi veprojnë në fshehtësi dhe angazhohen në aktivitete që mund të destabilizojnë vendin,” thuhet në deklaratën zyrtare. Gjithashtu, ministria akuzoi anëtarët e shpërbërë të Vëllazërisë për cenim të sigurisë kombëtare dhe rendit publik, dhe për përçarje të unitetit kombëtar.

 

Në një zhvillim tjetër, autoritetet thanë se një nga djemtë e liderëve të grupit ishte përfshirë në përpjekje për prodhimin dhe testimin e eksplozivëve për t’i përdorur kundër forcave të sigurisë. Emrat dhe detajet nuk u bënë publike.

 

Javën e kaluar, Jordania arrestoi 16 persona të akuzuar për prodhim raketash me rreze të shkurtër, armë automatike dhe trajnime të paligjshme. Autoritetet thanë se të arrestuarit i përkisnin “grupeve të palicencuara”, duke nënkuptuar Vëllazërinë Myslimane.

 

Vetë Vëllazëria ka mohuar akuzat, duke theksuar përkushtimin e saj ndaj sigurisë së Jordanisë. Sekretari i Përgjithshëm i Frontit të Veprimit Islamik, Wael Al-Saqqa, u distancua nga Vëllazëria, duke deklaruar se partia nuk ka lidhje me asnjë trup tjetër organizativ. Ai theksoi se partia ka vepruar gjithmonë në përputhje me ligjin dhe kushtetutën, dhe u shpreh i habitur nga bastisja e zyrave të partisë nga forcat e sigurisë.

 

Jordanisë, e vendosur në një rajon të trazuar, i është njohur prej kohësh stabiliteti i saj. Ajo kufizohet me Izraelin, Bregun Perëndimor të pushtuar, Sirinë, Irakun dhe Arabinë Saudite, dhe strehojnë qindra mijëra refugjatë nga konflikte të ndryshme në rajon.

 

Vëllazëria Myslimane, e themeluar në Egjipt gati një shekull më parë, ka degë në mbarë botën. Udhëheqësit e saj pretendojnë se kanë hequr dorë nga dhuna prej dekadash dhe synojnë vendosjen e rendit islam përmes zgjedhjeve dhe mjeteve paqësore. Megjithatë, shumë qeveri në rajon e shohin atë si një kërcënim serioz.