Kështu i kaloi orët e fundit Papa Françesku para se të ndërronte jetë: "Faleminderit që më solle sërish në shesh"

Në orët e fundit të jetës së tij, Papa Françesku shprehu një mirënjohje të thellë për ata që e kishin shoqëruar gjatë sëmundjes. Veçanërisht, ai i drejtoi disa fjalë prekëse infermierit të tij të besuar, Massimiliano Strappetti, të cilit i tha faleminderit që e kishte shoqëruar me 20 prill, të Dielën e Pashkëve, gjatë daljes së tij të fundit publike në sheshin e Shën Pjetrit.

"Faleminderit që më solle sërish në shesh", i tha Papa Strappettit, sipas portalit zyrtar Vatican News. Këto ishin disa nga fjalët e fundit të Papës, drejtuar njeriut që qëndroi pranë tij për 38 ditë gjatë qëndrimit në spitalin Policlinico Gemelli në Romë dhe më pas gjatë rikuperimit në Casa Santa Marta.

Strappetti ishte gjithashtu i pranishëm me Papën në kremtimin e ‘Urbi et Orbi’ atë të diel Pashke. Të shtunën, të dy vizituan Bazilikën e Shën Pjetrit për të parë rrugën që Papa do të bënte të nesërmen dhe për të dalë në Lozhën e Bekimeve.

"A mendon se do t'ia dal dot?"

Pas përshëndetjes së besimtarëve nga ballkoni qendror i Bazilikës, përpara rreth 50,000 personave të mbledhur, Papa befasoi të gjithë duke kaluar përmes Sheshit të Shën Pjetrit me papamobilin, një gjest që nuk ishte planifikuar fillimisht.

Para kësaj daljeje, Papa i kishte rrëfyer pasigurinë e tij Strappettit: "A mendon se do t'ia dal dot?", ndaj së cilës infermieri u përgjigj me fjalë inkurajuese. Më vonë, Papa do ta falënderonte sërish për ndihmën në këtë rikthim pranë popullit të tij.

Orët e fundit

Sipas Vatican News, pasditen e fundit Papa pushoi dhe darkoi i qetë. Rreth orës 5:30 të mëngjesit të së hënës u shfaqën shenjat e para të përkeqësimit, dhe ekipi mjekësor ndërhyri menjëherë. Më shumë se një orë më vonë, pasi u përshëndet me Strappettin, Papa ra në koma në dhomën e tij në katin e dytë të Casa Santa Marta-s.

Ata që e shoqëruan thonë se Papa nuk vuajti dhe se gjithçka ndodhi në mënyrë të qetë dhe të shpejtë. / Marca - Syri.net

© SYRI.net

Lexo edhe:

• Vala e të nxehtit në Itali lë 5 të vdekur, 17 qytete në alarm të kuq
• Trump: Irani po bën lëshime shumë të mëdha
• Rubio: Grupi teknik për Iranin do të ritakohet javën e ardhshme