Itali/ Ekzekutohet në mes të Romës çifti kinez, burri dyshohej të kishte lidhje me banda kriminale

Një çift kinez, i dyshuar për lidhje me bandat famëkeqe kineze të Triadës dhe me përfshirje në një luftë për kontrollin e tregut fitimprurës të tekstilit, u vra në Romë të hënën mbrëma. Lajmin e konfirmuan karabinierët italianë në një deklaratë për publikun.

Zhang Dayong, 53 vjeç, dhe bashkëshortja e tij, Gong Xiaoqing, 38 vjeç, u qëlluan për vdekje nga plumbat që i goditën në shpinë dhe në kokë, ndërsa po lëviznin me biçikleta. Sulmuesit, ende të paidentifikuar, ishin me motoçikletë dhe hapën zjarr në lagjen Pigneto të kryeqytetit italian, ku çifti po qëndronte.

Sipas autoriteteve, janë lëshuar të paktën gjashtë plumba në drejtim të tyre. Përplasjet me armë janë ngjarje të rralla në Itali, edhe në rastet që përfshijnë krimin e organizuar, për shkak të ligjeve të ashpra për mbajtjen e armëve të zjarrit, raportoi CNN.

Hetuesit dyshojnë se vrasja ka lidhje me të ashtuquajturën 'luftë e varëseve', një konflikt i brendshëm midis bandave kineze që kontrollojnë sektorin e tekstilit, veçanërisht në zonën industriale të modës në qytetin Prato, afër Firences. Kjo u bë e ditur në një konferencë për shtyp të mbajtur nga policia ditën e martë.

Zhang, i njohur ndryshe edhe me pseudonimin 'Asheng', ishte një nga të pandehurit kryesorë në një proces gjyqësor me 79 të akuzuar në total, që po zhvillohej në Firence. Ai akuzohej për drejtimin e një rrjeti të gjerë veprimtarish kriminale në Itali, Francë, Gjermani dhe Spanjë. Zhang kishte mohuar të gjitha akuzat, ndërsa CNN kishte kontaktuar avokatin e tij për një koment zyrtar.

Ky proces është rezultat i një hetimi të nisur në vitin 2018, i njohur si 'China Truck', që synonte të godiste rrjetet e trafikimit të njerëzve dhe kontrabandën e tekstileve të lidhura me organizata të stilit mafioz kinez në të gjithë Evropën. Hetimi u drejtua nga Drejtoria Kombëtare Anti-Mafia e Italisë.

Aktualisht, vrasja e dyfishtë po trajtohet si një akt hakmarrjeje. Asnjë person nuk është arrestuar deri tani dhe hetimet vazhdojnë.

© SYRI.net

Lexo edhe:

• Vala e të nxehtit në Itali lë 5 të vdekur, 17 qytete në alarm të kuq
• Trump: Irani po bën lëshime shumë të mëdha
• Rubio: Grupi teknik për Iranin do të ritakohet javën e ardhshme