Shefi i OKB-së ngre alarmin/ Guterres: Shumë i shqetësuar për dhunën e kolonëve izraelitë në Bregun Perëndimor

Shefi i OKB-së shprehu alarmin të hënën për dhunën në rritje nga kolonët izraelitë në Bregun Perëndimor dhe thirrjeve për aneksim, pasi Izraeli njoftoi operacione të zgjeruara ushtarake në territorin e pushtuar palestinez.

Izraeli tha të dielën se trupat e tij do të qëndrojnë për shumë muaj në kampet e refugjatëve në Bregun Perëndimor të pushtuar. Dhjetëra mijëra palestinezë që jetojnë atje, janë zhvendosur nga një operacion ushtarak në rritje.

 “Jam shumë i shqetësuar nga rritja e dhunës në Bregun Perëndimor të pushtuar nga kolonët izraelitë dhe shkeljet e tjera, si dhe thirrjet për aneksim”, tha Antonio Guterres në Këshillin e Kombeve të Bashkuara për të Drejtat e Njeriut në Gjenevë.

Ushtria filloi një sulm të madh kundër militantëve palestinezë në veri të Bregut Perëndimor një muaj më parë, vetëm pasi një armëpushim hyri në fuqi në Rripin e Gazës, një territor i veçantë palestinez.

Ofensiva e Bregut Perëndimor është zgjeruar gradualisht, duke përfshirë kampe të shumta refugjatësh pranë qyteteve Jenin, Tulkarem dhe Tubas.

Gjithashtu të dielën, ushtria izraelite njoftoi vendosjen e tankeve në Jenin, ku po "zgjeronte" operacionet.

Kjo shënon herën e parë që tanket operojnë në Bregun Perëndimor, që nga fundi i intifadës së dytë palestineze, ose kryengritjes, më 2005.

Dhuna në Bregun Perëndimor është rritur që nga fillimi i luftës së Gazës, që filloi pas sulmit vdekjeprurës të Hamasit më 7 tetor 2023 brenda Izraelit.

Guterres të hënën theksoi rëndësinë e armëpushimit të brishtë të vendosur në Gaza, që nga 19 janari.

“Ne jemi dëshmitarë të një armëpushimi të pasigurt. Ne duhet të shmangim me çdo kusht një rifillim të armiqësive. Njerëzit në Gaza tashmë kanë vuajtur shumë”, tha ai.

“Është koha për një armëpushim të përhershëm, lirim dinjitoz të të gjithë pengjeve të mbetura, përparim të pakthyeshëm drejt zgjidhjes me dy shtete, fund pushtimit dhe krijimit të një shteti të pavarur palestinez, me Gazën si pjesë integrale”./ Al Arabiya English.

© SYRI.net

Lexo edhe:

• Rubio: Grupi teknik për Iranin do të ritakohet javën e ardhshme
• Gjermania drejt pensionit në moshën 70-vjeçare, Merz: Reforma për të shpëtuar sistemin
• Ukraina po godet pikat e dobëta të Putin, por i mungojnë ushtarët për të fituar territor