Shpërthimi në Akademinë Amerikane të Parisit plagosi 24 persona, nis hetimi për shkakun

20:17, 21/06/2023

Paris - Një shpërthim i fortë hodhi në erë një ndërtesë në Bregun e Majtë të Parisit të mërkurën, duke lënë 24 persona të plagosur dhe duke ndezur një zjarr që ngriti tym mbi monumentet e qytetit dhe shkaktoi evakuimin e ndërtesave përreth, siç tha policia. Shkaku i shpërthimit nuk u kuptua menjëherë.

Fasada e një ndërtese në lagjen e 5-të ose distriktin, u shemb dhe shërbimet e urgjencës po punonin për të përcaktuar nëse kishte njerëz të bllokuar brenda, tha një zyrtar i policisë së Parisit. Shpërthimi ndodhi pranë spitalit historik ushtarak Val de Grace.

Shefi i policisë së Parisit, Laurent Nunez tha se ndërtesa ku ndodhi shpërthimi ishte një shkollë private, Akademia Amerikane e Parisit, e cila u themelua në vitin 1965 dhe ofron mësime në dizajnin e modës, dizajnin e brendshëm, artet e bukura dhe shkrimin krijues.

Zjarri është vënë nën kontroll, por ende nuk është shuar. Rreth 270 zjarrfikëse janë përfshirë në shuarjen e flakëve dhe 70 automjete të emergjencës kanë shkuar në vendngjarje.

Një zyrtar i policisë së Parisit tha për Associated Press se 24 persona u plagosën, duke përfshirë katër në gjendje kritike dhe 20 me lëndime më pak të rënda. Zyrtari thotë se plagët u pësuan kryesisht kur njerëzit ua mbathën këmbëve nga shpërthimi.

Zyrtarët nga qarku i 5-të gjykuan se shpërthimi dhe zjarri erdhën nga një rrjedhje gazi.

Kryebashkiakja e qarkut, Florence Berthout tha: "Shpërthimi ishte jashtëzakonisht i dhunshëm", duke treguar copa xhamash që ende binin nga ndërtesat.

Prokurori i Parisit tha se një hetim u hap për lëndime të rënduara të pavullnetshme dhe hetimi do të shqyrtojë nëse shpërthimi erdhi nga një shkelje e rregullave të sigurisë, që dyshohet.

Prokurorja e Parisit, Laure Beccuau tha se hetuesit do të kërkonin "të përcaktojnë nëse ka pasur apo jo mosrespektim të një rregulli apo pakujdesi individuale që çoi në shpërthim".

Nunez, shefi i policisë së Parisit, tha se zjarrfikësit parandaluan përhapjen e zjarrit në dy ndërtesa fqinje që u "destabilizuan seriozisht" nga shpërthimi dhe u evakuuan. Shpërthimi hodhi përdhe disa dritare në zonë, thanë dëshmitarët dhe shefi i policisë.

© SYRI.net

Lexo edhe:

• A po përgatitet Rusia për luftë me NATO-n?
• Bashkimi Evropian ndalon katër media ruse
• Zelensky e nënshkruan ligjin që lejon të dënuarit me burg të shërbejnë në ushtri