Forcat ruse rrëzuan “një numër të madh” dronësh në rajonin jugor të Belgorodit të Rusisë, tha një zyrtar vendor të mërkurën, një ditë pasi Moska njoftoi se forcat e saj mposhtën një sulm ndërkufitar në zonë nga Ukraina.
Dronët u kapën gjatë natës mbi provincë, tha guvernatori i Belgorod, Vyacheslav Gladkov në një postim në Telegram. Ai tha se askush nuk është lënduar, por janë dëmtuar ndërtesa të paspecifikuara administrative, ndërtesa banimi dhe makina.
Zyrtarët ukrainas nuk bënë asnjë koment të menjëhershëm.
Rusia tha një ditë më parë se mundi një nga sulmet më serioze ndërkufitare të luftës, me Ministrinë e Mbrojtjes që tha se më shumë se 70 sulmues u vranë në një betejë në Belgorod që zgjati rreth 24 orë. Ai nuk përmendi ndonjë viktimë ruse.
Zëdhënësi i Ministrisë ruse të Mbrojtjes, Igor Konashenkov tha se trupat lokale, sulmet ajrore dhe artileria i shpartalluan sulmuesit.
Dymbëdhjetë civilë u plagosën në sulm, thanë zyrtarët dhe një grua e moshuar vdiq gjatë një evakuimi.
Detajet e incidentit në zonën rurale, që shtrihet rreth 80 kilometra në veri të qytetit të Kharkiv në Ukrainën lindore dhe larg vijës së frontit të luftës pothuajse 15-mujore, janë të paqarta.
Moska fajësoi për sulmin që filloi të hënën, diversantët ushtarakë ukrainas, kurse Kievi e përshkroi atë si një kryengritje kundër Kremlinit nga partizanët rusë.
Ishte e pamundur të pajtoheshin dy versionet, të thuhej me siguri se kush qëndronte pas sulmit apo të konstatoheshin qëllimet e tij.
Rajoni është një qendër ushtarake ruse që mban depo karburanti dhe municioni. Zyrtarët e Moskës nuk pranuan të thonë se sa sulmues ishin të përfshirë në sulm ose të komentonin pse përpjekjet për të shuar sulmuesit zgjatën kaq shumë.
Rajoni i Belgorodit, si rajoni fqinj Bryansk dhe zona të tjera kufitare, ka dëshmuar një përhapje sporadike të luftës, të cilën Rusia e filloi duke pushtuar Ukrainën në shkurt 2022.
© SYRI.net
Kryeministri gjeorgjian mbron projektligjin për 'agjentët e huaj'
Franca stërvit ‘ushtrinë kibernetike’ kundër sulmeve gjatë Olimpiadës së Parisit
Trump po mendon t'i çojë në 3% shpenzimet e mbrojtjes të NATO-s
Denonco
Merrni lajmet më të fundit nga SYRI.net në çdo moment dhe kudo që të jeni!
