Kryeministri i Kroacisë, Andrej Plenkovic, ka bërë të ditur se pas rrëzimit të një droni në Zagreb, ka kërkuar nga presidenti i Francës, Emmanuel Macron që të dërgohet një avion për mbikëqyrje të qiellit kroat.
Një dron ushtarak që duket se fluturoi nga zonat e luftës në Ukrainë deri në Zagreb të Kroacisë, ku dhe u rrëzua, po barte një pajisje shpërthyese, thanë të dielën zyrtarë të Ministrisë së Mbrojtjes së Kroacisë.
Droni, i prodhimit sovjetik, fluturoi përmes Rumanisë dhe Hungarisë, para se të hynte në Kroaci.
Ky dron u rrëzua të enjten mbrëma pranë një konvikti studentor në kryeqytetin kroat.
Rreth 40 vetura që ishin të parkuara u dëmtuan nga shpërthimi i fuqishëm, por asnjë person nuk u plagos në këtë incident.
Kjo ka bërë që Kroacia të marrë masa më të shtrënguara për kujdes të hapësirës së saj ajrore.
“Pasi droni u rrëzua në Zagreb, me kërkesën time presidenti Emmanuel Macron miratoi dërgimin e avionit detar Hawkeye E2C për paralajmërimin e hershëm dhe kontrollin e hapësirës ajrore dhe fluturimin mbi qiellin kroat. Ne vazhdojmë të punojmë me aleatët e NATO-s”, tregoi kryeministri kroat në një postim.
Ndryshe, zyrtarët kroatë e kanë kritikuar NATO-n, për atë që ata e kanë cilësuar si reagim të ngadalshëm ndaj një incidenti shumë serioz, dhe kanë vënë në pikëpyetje gatishmërinë e aleancës ushtarake që të përgjigjen në rast të një sulmi.
NATO ka thënë se sistemi i integruar i mbrojtjes ajrore dhe raketore ka gjurmuar rrugën që ka përshkruar ky dron.
Por, zyrtarët kroatë thonë se nuk janë informuar nga NATO për këtë çështje.
Nakon pada drona na Zagreb, na moj zahtjev predsjednik @EmmanuelMacron odobrio je slanje mornaričkog aviona Hawkeye E2C za rano upozoravanje i kontrolu zračnog prostora te nadlijetanje hrvatskog neba. Nastavljamo suradnju sa saveznicima @NATO.
— Andrej Plenković (@AndrejPlenkovic) March 14, 2022
© SYRI.net