Tronditet pasuria e Elon Musk, humbet 13 miliardë dollarë në 24 orë

12:58, 21/04/2023

Pasuria e Elon Musk pësoi një goditje të rëndë duke rënë me 13 miliardë dollarë në vetëm 24 orë.

Në të njëjtën ditë kur raketa Starship e SpaceX shpërtheu në ajër pas lëshimit, edhe kompania e tij, Tesla, e makinave elektrike raportoi të dhëna tejet zhgënjyese në tremujorin e parë. Aksionet e Tesla-s ranë me 9,75 përqind dhe fitimet me 20 përqind.

Rënia që pësoi pasuria e Elon Musk ishte humbja më e madhe që ai ka pësuar gjatë këtij viti. Megjithatë, edhe pse ai tashmë ka 13 miliardë dollarë më pak, pasuria e tij neto llogaritet në 164 miliardë dollarë, sipas Bloomberg. Ai renditet ende i dyti në listën e më të pasurve të botës, me Bernard Arnault që kryeson listën.

Në anën tjetër, shkatërrimi i raketës Starship nuk është vlerësuar si një dështim nga Musk. SpaceX dhe miliarderi Elon Musk duken të lumtur dhe të kënaqur me rezultatin e lëshimit dhe gjatë videos njerëzit mund të dëgjohen duke brohoritur dhe duartrokitur.

Në video shihet edhe Elon Musk, i cili nuk duket se ka asnjë gjurmë shqetësimi. Shpërthimi i raketës nuk është dështim, sipas kompanisë së miliarderit. Kjo pasi, fakti që anija kozmike në fjalë, që është më e madhja e ndërtuar ndonjëherë, arriti të lëshohej nga baza, është cilësuar si një sukses shumë i madh.

© SYRI.net

Lexo edhe:

• TikTok nuk do të shitet, thotë pronari kinez në SHBA
• Filmi 'RRUGËS' nga Samir Karahoda, zyrtarisht në garën e filmave të shkurtë në Festivalin e Kanës
• WhatsApp njofton për uljen e kufirit të moshës së përdoruesve në disa vende