FIFA ka prezantuar një risi të madhe për Kupën e Botës 2026, duke ndryshuar mënyrën se si do të zhvillohet ceremonia para nisjes së çdo ndeshjeje. Organizata më e madhe e futbollit botëror synon ta bëjë turneun më spektakolar dhe më gjithëpërfshirës për lojtarët dhe tifozët.

Botërori i vitit 2026 do të jetë më i madhi në histori, me 48 kombëtare pjesëmarrëse, 104 ndeshje dhe organizim në tri shtete: Shtetet e Bashkuara të Amerikës, Kanada dhe Meksikë. Pikërisht për këtë arsye, FIFA dëshiron që çdo ndeshje të ketë atmosferën e një eventi të veçantë.

Sipas formatit të ri, të gjithë futbollistët e përfshirë në listën e ndeshjes, jo vetëm titullarët, do të vendosen rreth rrethit qendror gjatë interpretimit të himneve kombëtare. Kjo do të thotë se edhe zëvendësuesit do të jenë pjesë e ceremonisë në fushë para fillimit të takimit.

Përveç kësaj, FIFA ka planifikuar edhe elemente të tjera vizuale për ta bërë momentin më madhështor. Në stadiume do të përdoren flamuj gjigantë të kombëtareve, ndërsa lojtarët do të hyjnë në fushë përmes një harku të posaçëm të vendosur pranë tunelit.

Presidenti i FIFA-s, Gianni Infantino, deklaroi se ky ndryshim synon të krijojë një moment unik bashkimi dhe krenarie për lojtarët.

“Ndërsa Kupa e Botës vazhdon të zgjerohet, ne po inovojmë mënyrën se si përjetohet futbolli. Fakti që të gjithë lojtarët dhe arbitrat do të qëndrojnë përballë njëri-tjetrit në rrethin qendror gjatë himneve do të krijojë një moment uniteti, krenarie dhe emocionesh që u përket skuadrave dhe tifozëve”, u shpreh Infantino.

Megjithatë, mbetet për t’u parë se si do të pritet kjo risi nga tifozët. Nëse ceremonia do të realizohet në mënyrën e duhur, ajo mund të shtojë emocionet para ndeshjeve. Në të kundërt, ekziston rreziku që një pjesë e publikut ta konsiderojë si një spektakël të tepruar.