Arsenal ka marrë një lajm pozitiv në prag të sfidës së madhe ndaj Atlético Madridit në gjysmëfinalen e UEFA Champions League, pasi dy lojtarë kyç janë rikthyer në stërvitje dhe rrisin ndjeshëm opsionet e trajnerit Mikel Arteta.

Eberechi Eze dhe Riccardo Calafiori janë stërvitur normalisht me skuadrën në qendrën stërvitore të klubit, duke sinjalizuar se mund të jenë të gatshëm për ndeshjen e rëndësishme në Madrid. Eze kishte shqetësuar tifozët pasi u detyrua të linte fushën herët në fitoren ndaj Newcastle United në Premier League, por ai vetë e ka cilësuar situatën si një masë paraprake.

Edhe Calafiori, i cili nuk ka luajtur që nga çerekfinalja ndaj Sportingut, është pranë rikthimit. Trajneri Arteta ka theksuar më herët se mbrojtësi italian ishte “shumë afër” rikthimit, dhe pjesëmarrja e tij në stërvitje e konfirmon progresin.

Megjithatë, jo të gjitha lajmet janë pozitive për “Topçinjtë”. Kai Havertz do të mungojë në ndeshjen e parë për shkak të një dëmtimi muskulor të pësuar ndaj Newcastle, edhe pse pritet të rikthehet para fundit të sezonit. Po ashtu, Jurrien Timber nuk është stërvitur dhe vazhdon rikuperimin pas një problemi në kyçin e këmbës.

Në anën tjetër, rikthim të pjesshëm ka pasur edhe Bukayo Saka, i cili është rikthyer në fushë pas një dëmtimi dhe madje ka luajtur minutat e fundit ndaj Newcastle, duke dhënë sinjale pozitive për formën e tij.

Ndërkohë, Mikel Merino mbetet ende jashtë skuadrës, por po vazhdon procesin e rikuperimit me shpresën për të ndihmuar ekipin në fazën vendimtare të sezonit.

Arsenali udhëton në Madrid për ndeshjen e parë të gjysmëfinales, me synimin për të marrë një rezultat pozitiv para sfidës së kthimit në Londër, ku do të vendoset gjithçka për një vend në finalen e madhe të Champions League.