Real Madridi po përgatitet për një verë të nxehtë në merkato, me ndryshime të mëdha në skuadër. Sipas raportimeve të fundit, drejtuesit e klubit madrilen po planifikojnë një “revolucion” të vërtetë, ku deri në tetë lojtarë mund të largohen në fund të sezonit.

Në listën e emrave që mund të përshëndeten me stadiumin “Santiago Bernabéu” janë dy veteranë si Dani Carvajal dhe David Alaba, kontratat e të cilëve po shkojnë drejt fundit. Mosha dhe cikli i tyre në klub duket se kanë shtyrë drejtuesit të mendojnë për një rifreskim të repartit mbrojtës.

Përveç tyre, edhe disa lojtarë të tjerë nuk konsiderohen më pjesë thelbësore e projektit. Mes tyre përmenden Fran García, Eduardo Camavinga dhe Dani Ceballos, të cilët mund të sakrifikohen për të hapur rrugë për afrime të reja dhe për të balancuar financat e klubit.

Ndërkohë, Franco Mastantuono dhe Gonzalo García pritet të mos largohen përfundimisht, por të huazohen për të fituar më shumë eksperiencë. Ky është një model që Reali e ka përdorur me sukses edhe më parë.

Shembuj të tillë janë Endrick, i cili është huazuar te Lyoni, si dhe Nico Paz te Como e Víctor Muñoz te Osasuna.

Këto lëvizje tregojnë qartë se Real Madridi synon të hapë një kapitull të ri, duke ndërtuar një skuadër më të freskët dhe konkurruese për sezonet e ardhshme.