Atlético Madridi ka arritur një sukses të madh duke siguruar kualifikimin në gjysmëfinalet e UEFA Champions League për herë të parë pas vitit 2017. Kjo arritje nuk është vetëm sportive, por edhe financiare, pasi klubi madrilen ka përfituar tashmë mbi 100 milionë euro nga pjesëmarrja në këtë edicion.

Vetëm për kalimin në gjysmëfinale, Atlético ka arkëtuar edhe 15 milionë euro shtesë, duke e çuar totalin e fitimeve deri tani në 73.52 milionë euro. Kësaj shume pritet t’i shtohet edhe një komponent që lidhet me të drejtat televizive dhe koeficientin e klubit, i cili mund të sjellë mbi 30 milionë euro të tjera.

Nëse skuadra e drejtuar nga Diego Simeone arrin në finale, do të përfitojë edhe 18.5 milionë euro shtesë, ndërsa fituesi i turneut merr 25 milionë euro dhe trofeun prestigjioz.

Fitimet e këtij sezoni janë dukshëm më të larta krahasuar me vitet e kaluara. Për shembull, sezonin e kaluar Atlético fitoi rreth 84.9 milionë euro, ndërsa tani, vetëm me arritjen në gjysmëfinale, i afrohet dyfishit të shumave që merrte një dekadë më parë.

Megjithatë, forma sportive në javët e fundit ka qenë e luhatshme. Në gjashtë ndeshjet e fundit, madrilenët kanë fituar vetëm një, por pikërisht atë më të rëndësishmen: ndaj Barcelonës në “Camp Nou”, që vulosi kualifikimin.

Ndërkohë, skuadra vazhdon të luftojë edhe në Kupën e Mbretit, ku do të përballet me Real Sociedadin në finale. Për më tepër, ylli i ekipit Antoine Griezmann pritet të largohet në verë, duke synuar ta mbyllë aventurën e tij me trofe.

Atlético po jeton një sezon të veçantë, ku suksesi në fushë po shoqërohet edhe me përfitime të mëdha financiare.