Historia e Luvo Manyonga është një nga më tronditëset dhe frymëzueset në sportin modern. Kampioni i botës në kërcim së gjati në vitin 2017 po përgatitet për një rikthim të jashtëzakonshëm në elitë, teksa do të marrë pjesë në Kampionatin Botëror të Atletikës në sallë, që zhvillohet në Torun.

Karriera e 35-vjeçarit u ndërpre për vite të tëra për shkak të varësisë nga metanfetamina. Ai kishte marrë një pezullim fillestar në vitin 2012, ndërsa në vitin 2020 u dënua sërish me katër vite pezullim për shkelje të rregullave antidoping. Ky ndëshkim përfundoi në fund të vitit 2024, duke i hapur rrugën rikthimit.

Gjatë kësaj periudhe të errët, Manyonga rrëfen se jeta e tij ishte jashtë kontrollit. “Jetoja vetëm për dozën tjetër. Arrita në një pikë ku gjithçka kishte humbur kuptimin,” ka treguar ai. Për të siguruar drogën, ai pranoi se kishte kryer edhe vjedhje.

Momenti më dramatik erdhi në vitin 2023, kur u rrah brutalisht pas një grabitjeje dhe mbeti për një javë pa mundur të ecte. “E pashë jetën time të kalonte para syve. Më kishte mbetur vetëm vdekja,” u shpreh sportisti.

Pas kësaj ngjarjeje, ai vendosi të ndryshonte rrënjësisht jetën, duke u larguar nga droga dhe duke nisur një rrugë të re. Që prej asaj kohe, ai thotë se ka qëndruar i pastër dhe i fokusuar vetëm te sporti.

Sot, Manyonga është rikthyer në pistë dhe, megjithëse ende larg rekordit të tij personal prej 8.65 metrash, ka arritur rezultate inkurajuese, duke siguruar pjesëmarrjen në Botëror. Ish-medalist i argjendtë në Lojërat Olimpike Rio 2016, ai mbetet optimist për të ardhmen.

“Kam ende shumë për të dhënë. Ndihem si një makinë që ka qëndruar e ndalur për vite dhe tani është gati të shpërthejë,” deklaroi ai.

Historia e tij është një dëshmi e fortë se edhe nga momentet më të errëta, rikthimi është i mundur.