Manchester United është përfshirë në një çështje disiplinore, pasi mesfushori i ri, Jack Fletcher, është pezulluar me gjashtë ndeshje për një fyerje me përmbajtje homofobe ndaj një kundërshtari.

Ngjarja ka ndodhur më 21 tetor, gjatë ndeshjes së humbur 5-2 kundër Barnsley Football Club në kuadër të EFL Trophy. Futbollisti 18-vjeçar ishte ndëshkuar me karton të kuq në atë takim, ndërsa hetimi disiplinor ka çuar tani në një sanksion të rëndë.

Përveç pezullimit me gjashtë ndeshje, Fletcher është gjobitur me 1500 paundë dhe do të duhet të ndjekë një program të detyrueshëm edukativ me prezencë fizike.

Lojtari, djali i ish-legjendës së “Djajve të Kuq” Darren Fletcher, ka kërkuar falje publike për sjelljen e tij. “Më vjen sinqerisht keq për fyerjen e thënë në nxehtësinë e momentit. E kuptoj plotësisht që një gjuhë e tillë është e papranueshme dhe kam kërkuar falje menjëherë pas ndeshjes. Ishte një dobësi e çastit që nuk pasqyron bindjet apo vlerat e mia”, është shprehur ai.

Ky rast rikthen në vëmendje rëndësinë e luftës kundër çdo forme diskriminimi në futboll, me autoritetet që vazhdojnë të mbajnë një qëndrim të prerë ndaj sjelljeve të papërshtatshme në fushë.