Pamje që për tifozët kuqezinj janë kthyer në rutinë: festë nën sektor, duartrokitje, ritëm i lartë në fushë dhe Massimiliano Allegri që largohet i qetë drejt dhomave të zhveshjes, me buzëqeshjen e përmbajtur të atij që e di se ekipi i tij po funksionon. Fitorja e pastër 3-0 në Bologna është vetëm kapitulli i radhës i një serie mbresëlënëse. Adrien Rabiot e përmblodhi thjesht pas ndeshjes: “Ishte një fitore e bukur për tifozët tanë”.

Milani e mbylli shpejt sfidën dhe u kthye menjëherë në Milano për të ndjekur programin: stërvitje të enjten, pushim deri të shtunën, ndërsa të premten, më 13 shkurt, kampionati do të rifillojë me transfertën ndaj Pisës.

Shifrat flasin qartë. Kuqezinjtë janë të pamposhtur në 12 ndeshje radhazi jashtë fushe, me 7 fitore dhe 5 barazime, diçka që nuk kishte ndodhur që nga sezoni 2004-2005. Në pesë kampionatet kryesore europiane, vetëm Milani dhe Bayern nuk kanë njohur humbje në transfertë.

Në Serie A, seria është edhe më domethënëse: 22 ndeshje pa humbje, me 14 fitore dhe 8 barazime, rekord që të kujton kohët e Fabio Capello-s në sezonin 1992-1993. Mbrojtja ka pësuar vetëm 17 gola në 23 javë, ndërsa në sulm Pulisic dhe Leao mbeten pika e fortë.

Me 50 pikë pas javës së 23-të, Milani po përjeton një sezon të jashtëzakonshëm. Avantazhi ndaj ndjekësve është i ndjeshëm, por për ta ruajtur kërkohet vazhdimësi, sidomos ndaj skuadrave më të vogla dhe një kontribut edhe më vendimtar nga ‘yjet’ ofensivë në muajt në vazhdim.