Lamine Yamal vazhdon të thyejë rekorde, këtë herë jo në fushën e lojës, por në botën dixhitale. ‘Ylli’ i ri i Barcelonës, vetëm 18 vjeç, ka debutuar në YouTube me shifra marramendëse: i ka mjaftuar publikimi i një videoje të vetme për të kaluar pragun e 1 milion abonentëve në më pak se 48 orë. Një rritje e jashtëzakonshme që tregon qartë ndikimin global të talentit ‘blaugrana’.

Për të kuptuar më mirë përmasat e këtij fenomeni, mjafton një krahasim me disa nga emrat më të mëdhenj të futbollit botëror. Jude Bellingham, i cili ka hapur kanalin e tij më shumë se një vit më parë dhe ka publikuar 13 video, numëron rreth 913 mijë abonentë. Vinícius Jr, aktiv në YouTube prej gjashtë vitesh me 44 video, ka arritur në 2,4 milionë ndjekës. Neymar, një nga figurat më të njohura globale, pas 15 vitesh aktiviteti dhe mbi 450 videove, ka rreth 4,5 milionë abonentë. Edhe Sergio “Kun” Agüero, një nga pionierët e platformës mes futbollistëve, me afro 500 video që nga viti 2010, ndalet në rreth 4,35 milionë.

Në kontrast të plotë, Lamine Yamal ka arritur shifra që të tjerëve u janë dashur vite për t’i ndërtuar, brenda vetëm dy ditësh dhe me një përmbajtje të vetme. Ky fakt konfirmon se talenti spanjoll nuk është thjesht një fenomen në fushë, por edhe një ikonë e re pop, e aftë të mobilizojë masa të mëdha në rrjetet sociale me një shpejtësi të paprecedentë.