Venus Williams dhe aktori italian, Andrea Preti, kanë kurorëzuar sërish dashurinë e tyre, këtë herë në Palm Beach, Florida, me një ceremoni të dytë për arsye burokratike, e shoqëruar nga një festë madhështore që zgjati plot pesë ditë. Çifti ishte martuar fillimisht më 19 shtator në Ischia, në një ceremoni intime dhe elegante, por dasma amerikane e ka ngritur edhe më shumë nivelin e festimeve.

Ngjarja u kthye shpejt në temë diskutimi në rrjetet sociale, jo vetëm për luksin dhe organizimin e jashtëzakonshëm, por sidomos për dhuratën spektakolare që Venus mori nga motra e saj, legjendarja Serena Williams. Ish-kampionia e madhe e tenisit botëror nuk e fshehu gëzimin për martesën e motrës dhe vendosi ta shprehë atë në mënyrën më madhështore të mundshme: duke i dhuruar një jaht luksoz.

Serena ndau edhe mesazhe emocionuese në rrjetet sociale, ku u shpreh shumë e lumtur për këtë kapitull të ri në jetën e Venusit, duke treguar edhe një herë lidhjen e fortë që i bashkon dy motrat Williams, jo vetëm në sport, por edhe në jetë.

Dasma e dytë në Florida u karakterizua nga eleganca, miqtë e afërt dhe familjarët, si dhe nga një atmosferë festive që zgjati disa ditë, duke e kthyer këtë martesë në një event të vërtetë VIP.

Pas një karriere të jashtëzakonshme sportive, Venus Williams duket se po shijon një periudhë të re lumturie personale, ndërsa dhurata e Serenës vetëm sa e bëri këtë moment edhe më të paharrueshëm.