Boksieri amerikan, Jake Paul, do të mungojë deri në nëntë muaj për shkak të komplikimeve nga thyerja e nofullës që pësoi gjatë humbjes brutale ndaj Anthony Joshua të premten e kaluar. Paul u përball me dy herë kampionin e botës në peshat e rënda dhe u dorëzua pas një goditjeje të fortë të djathtë që e rrëzoi në tapet.

Pas ndeshjes, Paul zbuloi se kishte thyer nofullën në dy vende dhe u dërgua në spital për operacion. Ai postoi më pas foto nga shtrati i spitalit dhe deklaroi se do të duhet të ndjekë një dietë të lëngshme për një javë.

Sipas raportimeve të Daily Mail, thyerjet e nofullës kalojnë pranë rrënjëve të dhëmbëve, dhe Paul do të ketë nevojë për implante dentare. Megjithatë, përpara këtij trajtimi, ai duhet të presë rreth tre muaj për shërimin e thyerjeve. Për më tepër, ai mund të jetë i detyruar të vendosë kurora mbi implantet, proces që mund të zgjasë edhe gjashtë deri në shtatë muaj të tjerë.

Kjo situatë e bën rikuperimin e tij shumë të gjatë dhe të ndërlikuar, duke e mbajtur jashtë ringut për një periudhë të konsiderueshme.