Klisman Cake, një nga prurjet më të reja të Kombëtares Shqiptare, foli sot në konferencën për shtyp përpara trajnerit Sylvinho, duke ndarë emocionet e para me fanellën kuqezi dhe përvojën e tij në grumbullimin aktual.

“Emocionet nuk mund t’i përshkruaj. Çdo fëmijë ëndërron të luajë për Kombëtaren, dhe unë momentalisht po jetoj një ëndërr,” – u shpreh Cake, i cili vjen nga ekipi i Shkëndijës së Tetovës.

Sulmuesi 24-vjeçar theksoi se është pritur në mënyrën më të mirë nga grupi: “Grupi është shumë i mirë, i bashkuar. Djemtë janë gjithmonë aty për njëri-tjetrin dhe mikpritja për mua ka qenë e shkëlqyer.”

I pyetur për komunikimin me trajnerin Sylvinho, Cake u tregua i qartë: “Kam folur me të ditën kur jam grumbulluar në hotel. Askush nuk merr një premtim për minuta loje, jemi këtu për të dhënë kontributin tonë për Kombëtaren.”

Sa i përket ftesës, Çake pranoi se nuk e priste: “Nuk e kisha menduar, por tani që jam këtu, e ndiej plotësisht krenarinë për të qenë pjesë e Kombëtares. Gjithë jetën time kam qenë kuqezi.”

Ai foli edhe për reagimin në klubin e tij, Shkëndija e Tetovës: “Të gjithë janë gëzuar shumë, nga drejtuesit deri te bashkëlojtarët. E dimë sa shumë e duan Kombëtaren të gjithë te Shkëndija.”

Në fund, Cake dha edhe një mesazh për tifozët shqiptarë:

“Tifozët janë forca jonë më e madhe. I ftoj të gjithë të jenë në stadium, sikurse festuan me gjithë botën fitoren ndaj Serbisë. Të vijnë ta festojnë me ne edhe këtë miqësore.”