Fillimi i sezonit për Manchester United nuk ka sjellë asnjë ndryshim krahasuar me vitin e kaluar. Pas humbjes 3–0 në derbin ndaj Manchester City-t, trajneri Ruben Amorim u shpreh hapur: “Nuk është bilanci që duhet të ketë Manchester United”. Pavarësisht mbështetjes zyrtare nga drejtuesit e klubit, raportimet nga Anglia thonë se durimi po soset.

Sipas ‘Mirror’, bordi i “Djajve të Kuq” i ka dhënë portugezit vetëm tri ndeshje afat për të përmbysur situatën. Nëse rezultatet nuk ndryshojnë ndaj Chelsea-t (në shtëpi), Brentford-iy (në transfertë) dhe Sunderland-it (në shtëpi), atëherë Amorim pritet të largohet.

Kandidatët për stolin e United

Gazeta britanike përmend pesë emra që janë në shënjestër të klubit:

• Oliver Glasner (Crystal Palace) – solli sezonin më të suksesshëm në historinë e Palace duke fituar FA Cup dhe Superkupën angleze.
• Gareth Southgate – i lirë që prej largimit nga kombëtarja e Anglisë në vitin 2024, pas humbjes në finalen e dytë radhazi të Europianit.
• Andoni Iraola (Bournemouth) – sezonin e kaluar e çoi skuadrën në vendin e 9-të, duke barazuar rekordin historik të klubit, dhe aktualisht ndodhet në vendin e 4-t.
• Mauricio Pochettino – sot në krye të kombëtares së SHBA-së, të cilën po e përgatit për Botërorin 2026. Më i njohur për periudhën te Tottenham-i, ku arriti finalen e Champions League në 2019.
• Marco Silva (Fulham) – i ka dhënë identitet skuadrës londineze, që sezonin e kaluar përfundoi në vendin e 11-të, duke shpresuar deri në fund për kualifikim europian.

Presioni rritet

Me lojtarë si Bruno Fernandes dhe Diogo Dalot në skuadër, pritshmëritë për United mbeten shumë të larta. Sidoqoftë, statistikat e fundit janë zhgënjyese: vetëm 11 fitore në 38 ndeshje të Premier League-s sezonin e kaluar dhe një renditje në vendin e 15-të. Nëse Amorim nuk arrin të përmbysë trajektoren brenda tri ndeshjeve të ardhshme, drejtuesit pritet të veprojnë me vendosmëri.