Trajneri Antonio Conte thotë se Napoli duhet t’ia dalë pa shërbimet e qendërmbrojtësit Amir Rrahmani, i cili do të jetë mungesë e madhe.

Rrahmani pësoi dëmtim teksa përfaqësonte Kombëtaren e Kosovës në humbjen e rëndë në Zvicër, e si pasojë do të jetë për disa javë jashtë fushës.

Lëndimin e Rrahmanit e ka komentuar edhe tekniku italian, që tha se duhet t’ia dalin pa yllin kosovar, i cili vazhdimisht ka qenë shumë i rëndësishëm te napolitanët.

“Mungesë e madhe. Vitin e kaluar zhvilloi 38 ndeshje nga 38 të mundshme, një shtyllë te skuadra. Por, siç thashë, kur ka lojë çdo tre ditë në pushimet ndërkombëtare, atëherë gjasat e lëndimeve janë më të mëdha.

Për këtë arsye jemi përgatitur në afatin e verës. Beukema arriti, Marianucci gjithashtu dhe ndoshta do të luajnë titullarë nesër, na duhet t’i inkuadrojmë në ritmin e skuadrës. Përpos De Bruyne, gjithnjë kam thënë se do të nënshkruajë me lojtarë për të tashmen dhe të ardhmen”, deklaroi Conte.