Antony është në rrugë drejt Sevillës për të nisur aventurën e tij të dytë me Real Betisin. Sulmuesi brazilian ka hipur në një avion privat nga Mançesteri, së bashku me vëllanë dhe agjentët e tij, dhe pritet të zbarkojë sonte në kryeqytetin andaluz, ku do të firmosë kontratën që e lidh me verdhebardhët deri më 30 qershor 2030.

Transferimi i Antony-t është arritur pas një marrëveshjeje mes Manchester United dhe Betisit, me shifrën bazë prej 22 milionë eurosh dhe bonuse që mund të shkojnë deri në katër milionë shtesë, ndërsa anglezët do të ruajnë 50% të vlerës në rast të një shitjeje të ardhshme. Zvarritja e dokumentacionit nga ana e "Red Devils" bëri që fluturimi i lojtarit të nisej me vonesë, por gjithçka është planifikuar që ai të nënshkruajë përpara mbylljes së merkatos.

Kthimi i Antony-t në “Benito Villamarín” shihet si goditja më e madhe e Betisit në këtë merkato, një operacion i bujshëm që ka mbajtur tifozët në pritje prej muajsh, që nga fundi i majit dhe finalja e Conference League. Entuziazmi është maksimal, pasi braziliani rikthehet për të forcuar skuadrën në sezonin 2025-26.

Në të njëjtën kohë, drejtuesit e klubit po përpiqen të mbyllin lëvizjet e fundit të merkatos. Një dalje e mundshme e Chimy Ávila ose Bakambu do t’i hapte rrugën një afrimi tjetër në repartin ofensiv, ndërsa Altimira pritet të qëndrojë, pasi interesimi nga Premier League është zbehur. Betisi ka edhe disa orë për të vendosur, por Antony është tashmë goditja e madhe e verës.