Te Bayer Leverkusen situata është ndezur që në fillim të sezonit. Vetëm pas dy javëve të para të Bundesligës, mediat gjermane më të besueshme raportojnë se drejtuesit e klubit po mendojnë seriozisht shkarkimin e trajnerit Erik ten Hag.

Sipas korrespondentit të Kicker, Stephan van Nocks, krerët e “Werkself” e konsiderojnë të dështuar eksperimentin me holandezin dhe janë gati ta ndërpresin bashkëpunimin. Humbja e turpshme ndaj Werder Bremen-it ka thelluar krizën dhe pas deklaratave të pas-ndeshjes, ku ten Hag kritikoi hapur menaxhimin e merkatos dhe strukturën e skuadrës, marrëdhënia mes tij dhe klubit duket e prishur.

As dhomat e zhveshjes nuk duken më pranë trajnerit. Kapiteni i ri i emëruar nga vetë ten Hag, Robert Andrich, kritikoi ashpër mungesën e kohezionit dhe shpirtit ekipor:

“Kjo nuk ka të bëjë me ndryshime lojtarësh apo me trazira, por me mënyrën se si luajmë në fushë. Secili mendon vetëm për veten. Nuk jemi skuadër.”

Ndërsa Ten Hag u shpreh se “skuadra është në ndryshim, me hierarki të reja dhe lojtarë që duhet të marrin përgjegjësi, gjë që nuk ndodhi”, fjalët e tij nuk gjetën mbështetje në zyrat e klubit.

Sipas burimeve pranë Leverkusenit, vendimi përfundimtar pritet të merret menjëherë pas mbylljes së merkatos së verës. Megjithatë, raportimet theksojnë se drejtuesit kanë “tashmë mendjen e ndarë” dhe largimi i Ten Hag duket vetëm çështje kohe.