SYRI TV

Durrësi, një qytet bregdetar nuk ka vend për parkimin e makinave. Teksa në rrugët e qytetit shihen makina të harruara, Policia Bashkiake e Durrësit në vend të marrë masa për heqjen e tyre, shqetësohet vetëm për vendosjen e gjobave. Syri Tv ka bërë një vëzhgim në qytetin e Durrësit dhe shihet që mungon parkimi publik, ndërsa ai me pagesë nuk përballohet nga të gjithë.

Qyteti bregdetar përballet çdo ditë me kaos parkimesh, lagjet janë të mbushura me makina në të dy anët e rrugëve dhe qytetarët hasin vështirësi të gjejnë një vend parkimi bosh, pavarësisht se zyrtarisht ekzistojnë 7 sheshe dhe 16 segmente rrugësh të destinuara për parkim me pagesë, ndërsa parkimi pa pagesë aplikohet vetëm për rezidentët në hapësirat mes pallateve.  

Situata bëhet edhe më kaotike gjatë sezonit veror, kur shtimi i numrit të automjeteve rritet ndjeshëm dhe Durrësi nuk ka parkime publike. Ndërkohë që këtë e vuajnë durrsakët çdo ditë, teksa shohin në xhamat e makinës së tyre gjoba për parkim.

Ndërkohë nga ana tjetër nga një vëzhgim i bërë nga Syri Tv shihet se në rrugët kryesore apo edhe dytësore, qëndrojnë prej muajsh madje mund të thuhet prej vitesh makina të parkuara që nuk lëvizen dhe nuk kryejnë asnjë lloj funksioni. E teksa Policia Bashkiake e Durrësit e ka vëmendjen të vendos sa më shumë gjoba te shoferët që nuk kanë vend ku të përkojnë, nuk sheh makinat që prej kohësh qëndrojnë anash rrugës duke u kthyer në një varrezë të automjeteve të dëmtuara. 

Edhe pse janë të ashtuquajturat Zona A dhe Zona B, që përfshijnë 16 rrugë të qytetit, sistemi i parkimeve në Durrës mbetet larg funksionimit. Mungesa e vendeve të parkimit ka hapur rrugë abuzimeve: qytetarëve iu është dashur madje të paguajnë edhe në hapësira ku parkimi është falas. Më 29 gusht 2024, Policia e Durrësit arrestoi dy persona, të cilët iu merrnin para qytetarëve në një vend-parkim publik pranë stadiumit, i cili sipas Bashkisë ishte i destinuar si hapësirë pa pagesë. Nga vendimet e miratuara të Këshillit Bashkiak nuk rezulton të ketë asnjë hapësirë të dedikuar falas për parkim në qytet, përveçse rasteve të rezidentëve.