A transmetohet gluteni përmes puthjes?

Sipas një studimi të ri, gluteni mund të kalojë nga një person tek tjetri përmes puthjes. Megjithatë, shkencëtarët thonë se rreziku është “i ulët dhe lehtësisht i reduktueshëm”, mjafton të pihet një gotë ujë para puthjes, veçanërisht për personat me sëmundje celiake.

Për rreth një në 100 persona që jetojnë me këtë sëmundje, frika nga ekspozimi ndaj glutenit nuk kufizohet vetëm tek ushqimi, por mund të shtrihet edhe në momente intime. Megjithatë, studiuesit amerikanë thonë se ky studim sjell lajme “qetësuese”.

Dr. Anne Lee nga Universiteti Columbia në Nju Jork tha: “Edhe pse gluteni mund të transmetohet përmes puthjes, sasia është zakonisht shumë e vogël dhe mund të ulet në nivele të sigurta me një hap të thjeshtë.”

Ajo shpjegoi se për personat me sëmundje celiake, konsumimi i glutenit, edhe pa simptoma të menjëhershme, mund të shkaktojë dëmtime në zorrë, ndaj kërkohet një dietë strikte pa gluten gjatë gjithë jetës.

Studime të mëparshme kanë treguar se frika nga ekspozimi aksidental mund të shkaktojë ankth, vigjilencë të tepruar dhe shmangie sociale, sidomos në marrëdhënie dhe takime romantike.

Në studimin e parë që mat ekspozimin ndaj glutenit përmes puthjes, studiuesit analizuan 10 çifte, ku njëri partner kishte sëmundje celiake dhe tjetri jo. Studimi u publikua në revistën “Gastroenterology”.

Ata testuan nëse gluteni i konsumuar nga partneri pa sëmundje mund të transmetohej përmes një puthjeje dhe shkëmbim pështyme, si dhe nëse kjo përbënte rrezik real.

Në dy skenarë, partneri pa sëmundje hëngri 10 biskota dhe më pas puthi partnerin. Në njërin rast pritën pesë minuta, ndërsa në tjetrin, ai piu ujë menjëherë pas ngrënies dhe pastaj u puthën.

Rezultatet treguan se në 90% të rasteve niveli i glutenit ishte nën kufirin e sigurt prej 20 pjesë për milion. Vetëm dy raste e kaluan këtë kufi dhe edhe atëherë sasia ishte e papërfillshme.

Kur partneri pinte ujë para puthjes, asnjë mostër nuk e kaloi kufirin dhe në 60% të rasteve nuk u zbulua fare gluten. / Talker News – Syri.net