Obeziteti mund të jetë kryesisht rezultat i gjeneve, sipas një studimi të ri. Analiza e mbi 86 mijë fëmijëve norvegjezë tregon se lidhja mes indeksit të masës trupore (BMI) të prindërve dhe BMI-së së fëmijëve është në pjesën më të madhe pasojë e trashëgimisë gjenetike, dhe jo e ndikimit biologjik të peshës së nënës gjatë shtatzënisë.

Studiuesit analizuan të dhëna nga fëmijë të lindur mes viteve 1999 dhe 2009, duke përfshirë peshën në lindje, BMI-në nga mosha gjashtë muajsh deri në tetë vjeç dhe sjelljet e të ngrënit. Duke krahasuar binjakë, vëllezër e motra dhe gjysmëvëllezër në disa breza, ata vlerësuan se sa pjesë e lidhjes mes BMI-së së prindërve dhe fëmijëve shpjegohet nga gjenet.

Rezultatet treguan se BMI-ja e nënës ndikonte më shumë në peshën e foshnjës në lindje, çka lidhet me mjedisin brenda mitrës. Megjithatë, pas moshës dyvjeçare, ndikimi i BMI-së së nënës dhe babait mbi BMI-në e fëmijës ishte pothuajse i njëjtë.

Modelet statistikore treguan se gjenet shpjegonin rreth 79% të lidhjes mes BMI-së së nënës dhe fëmijës në moshën tetëvjeçare, ndërsa për baballarët kjo shifër arrinte në 94%.

Prindërit me BMI më të lartë kishin gjithashtu fëmijë me më shumë sjellje të lidhura me obezitetin, si ngrënia emocionale dhe dëshira më e madhe për ushqim, megjithëse studiuesit nuk mundën të përcaktonin sa prej këtij ndikimi ishte gjenetik.

Autorët theksojnë se rezultatet nuk do të thonë se obeziteti është i pashmangshëm për fëmijët e prindërve me mbipeshë. Edhe kur ekziston një prirje gjenetike, mjedisi dhe stili i jetesës mund të ndikojnë në mënyrën se si shprehen këto gjene. Sipas tyre, mbajtja e një peshe të shëndetshme nga prindërit është e rëndësishme, por vetëm kjo nuk garanton që edhe fëmijët do të kenë peshë normale. / Talker News – Syri.net