Shëtitjet e shkurtra apo ato më të gjata?/ Studimi tregon se çfarë është më e mirë për zemrën

Është ideale të ecësh për të paktën 15 minuta pa ndërprerje. Kjo është rreth 1,500 hapa të njëpasnjëshëm, që është një stërvitje e mirë për zemrën.

Një shëtitje e gjatë në ditë është më e mirë për zemrën sesa disa shëtitje të shkurtra, veçanërisht nëse nuk bëni shumë aktivitet fizik, sipas një studimi të ri të botuar në revistën Annals of Internal Medicine.

Është ideale të ecësh për të paktën 15 minuta pa ndërprerje. Kjo është rreth 1,500 hapa të njëpasnjëshëm, që është një stërvitje e mirë për zemrën, raporton BBC .Shumë njerëz synojnë të bëjnë 10,000 hapa në ditë, por ky numër vjen nga një reklamë japoneze për pedometrin – jo nga shkenca. Megjithatë, ekspertët bien dakord se më shumë hapa janë përgjithësisht më të mirë për shëndetin.

Studimi përfshinte 33,560 të rritur të moshës 40 deri në 79 vjeç në Mbretërinë e Bashkuar, të cilët ecnin më pak se 8,000 hapa në ditë.

Pjesëmarrësit u ndanë sipas gjatësisë së shëtitjeve të tyre, të matura me një pedometër gjatë një jave:

më pak se 5 minuta (43 përqind)
nga 5 deri në 10 minuta (33.5 përqind)
nga 10 deri në 15 minuta (15.5 përqind)
15 minuta ose më shumë (8 përqind)

Studiues nga Universiteti i Sidneit dhe Universiteti Evropian në Spanjë ndoqën shëndetin e tyre për tetë vjet.

Njerëzit që ecnin për intervale më të gjata kishin një rrezik më të ulët për probleme me zemrën krahasuar me ata që ecnin në intervale të shkurtra.

Edhe tek personat më pak aktivë, ata që ecnin më pak se 5,000 hapa në ditë, ecjet më të gjata kishin një ndikim të madh. Rreziku i tyre për sëmundje të zemrës dhe vdekje ra ndjeshëm.Nuk është plotësisht e qartë nëse kjo ndodh për shkak se këta njerëz ishin fizikisht më në formë që në fillim, por studiuesit u përpoqën ta merrnin parasysh këtë, duke përfshirë faktorë të tillë si pirja e duhanit, mbipesha ose kolesteroli i lartë.

Përqendrohuni në mënyrën se si ecni

Studiuesit raportojnë se mënyra se si ecni është e rëndësishme, jo vetëm sa. Ecja për periudha më të gjata kohore, edhe nëse nuk ecni shumë në përgjithësi, duket se i bën mirë zemrës.

Ndryshime të thjeshta, si gjetja e kohës për një shëtitje më të gjatë, mund të bëjnë një ndryshim të madh, besojnë ata.

Bashkautori i studimit, Profesor Emanuel Stamatakis, tha se ne kemi tendencën ta vëmë të gjithë theksin te numri i hapave ose te sasia totale e ecjes, duke lënë pas dore rolin kyç të modelit, domethënë mënyrës se si ecim.

"Ky studim tregon se edhe njerëzit që janë shumë fizikisht joaktivë mund ta maksimizojnë shëndetin e zemrës së tyre duke rregulluar mënyrën e ecjes dhe duke ecur për periudha më të gjata kohore, idealisht të paktën 10 deri në 15 minuta, sa herë që është e mundur", tha ai.

Profesori Kevin McConway, profesor emeritus i statistikave të aplikuara, tha se studimi tregon një lidhje midis ecjes dhe shëndetit më të mirë të zemrës, por nuk vërteton se ecja shkakton drejtpërdrejt këtë përmirësim.

Shërbimi Shëndetësor Kombëtar - NHS rekomandon 150 minuta aktivitet fizik të moderuar në javë, siç është ecja e shpejtë, idealisht e shpërndarë në mënyrë të barabartë gjatë gjithë javës.

Të moshuarit mbi 65 vjeç duhet të lëvizin çdo ditë, edhe nëse është vetëm aktivitet i lehtë nëpër shtëpi, thuhet në rekomandime.

Emily McGrath, infermiere e lartë e kardiologjisë në Fondacionin Britanik të Zemrës, tha se "ushtrimet fizike i ndihmojnë të gjithë të jetojnë një jetë më të lumtur dhe më të shëndetshme"."Nëse keni probleme me zemrën dhe qarkullimin e gjakut, kjo mund t'ju ndihmojë të mbani gjendjen tuaj nën kontroll dhe t'ju bëjë të ndiheni më mirë në përgjithësi", shtoi ajo.

Siç deklaroi ajo, "në fillim mund të jetë e vështirë për ju të jeni më aktivë, por do të bëhet më e lehtë me kalimin e kohës, ndërsa trupi mësohet me aktivitetin".

"Në fillim, mund të vini re vetëm përmirësime të vogla, por të gjitha këto shtohen dhe ndihmojnë në mbajtjen e zemrës suaj të shëndetshme", tha ajo.

Si të qëndroni të sigurt gjatë ecjes

Nëse ecni ose ngasni biçikletën natën ose në kushte me dritë të ulët, vishni rroba reflektuese ose përdorni një elektrik dore ose një llambë koke për t'u bërë më të dukshëm për përdoruesit e tjerë të rrugës.

Jini të kujdesshëm dhe të vetëdijshëm për mjedisin përreth. Përdorni korsitë ose shtigjet e shënuara, nëse ka. Gjithmonë kaloni rrugën në vendkalimet e shënuara për këmbësorë, ku shoferët presin këmbësorë dhe janë më të lehtë për t'u dalluar.