Një studim i ri zbulon se fëmijët i plakin gratë. Dhe sa më shumë fëmijë të kesh, aq më e vjetër bëhesh. Studiuesit zbuluan se çdo shtatzëni i shtonte dy muaj moshës biologjike të një gruaje të re, por nuk kishte asnjë efekt te burrat. Megjithatë, rezultatet e studimit te mbi 1735 të rinj në Filipine mund të thuhet se vlejnë vetëm për gratë e reja që janë ende në fazë rritjeje kur mbeten shtatzënë.

Mendohet se femrat ndalojnë së rrituri mes moshës 18 dhe 25 vjeçe.

Ekipi i Qendrës së Plakjes në Columbia të New York-ut, përdori 'orët epigjenetike' për të studiuar plakjen biologjike tek gratë. Ky mjet funksionon duke përdorur metilimin e ADN-së - një reaksion kimik në trup ku një molekulë e vogël i shtohet ADN-së - për të llogaritur plakjen biologjike. Ata zbuluan se çdo shtatzëni shtesë gjatë moshës madhore të hershme përshpejtonte procesin e plakjes me më shumë se dy muaj.

Tek burrat, lindja e fëmijëve nuk u pa të ketë ndonjë ndikim në plakjen e tyre, gjë që sugjeron se shkaktohet nga shtatzënia ose ushqyerja me gji.

Studimi, i publikuar në The Proceedings of National Academy of Sciences konfirmoi se gratë që raportuan se ishin shtatzënë dukeshin biologjikisht më të vjetra se gratë që nuk kishin qenë kurrë shtatzëna.

Autori kryesor dr. Calen Ryan tha: "Orët epigjenetike kanë revolucionarizuar mënyrën se si ne studiojmë plakjen biologjike gjatë gjithë jetës dhe hapin mundësi të reja për të studiuar se si dhe kur ndodhin kostot afatgjata shëndetësore të riprodhimit dhe ngjarjeve të tjera të jetës. Gjetjet tona sugjerojnë se shtatzënia përshpejton plakjen biologjike dhe se këto efekte janë të dukshme tek gratë e reja me fertilitet të lartë. Rezultatet tona janë gjithashtu të parat që ndjekin të njëjtat gra me kalimin e kohës, duke i lidhur ndryshimet në numrin e shtatzënisë së secilës grua me ndryshimet në moshën e saj biologjike."

Studiuesit paralajmërojnë se këto gjetje mund të jenë të zbatueshme vetëm për gratë që janë ende në rritje kur mbeten shtatzënë dhe duhet të bëhen më shumë kërkime mbi këtë temë për të konfirmuar rezultatet e tyre.

Dr. Ryan shtoi: "Shumë nga shtatzënitë e raportuara në matjen tonë bazë kanë ndodhur gjatë adoleshencës së vonë, kur gratë janë ende në rritje. Ne presim që kjo lloj shtatzënie të jetë sfiduese për një nënë në rritje, veçanërisht nëse aksesi i saj në kujdesin shëndetësor, burimet ose forma të tjera të mbështetjes është i kufizuar. Ne kemi ende shumë për të mësuar rreth rolit të shtatzënisë dhe aspekteve të tjera të riprodhimit në procesin e plakjes. Në fund të fundit, mendoj se gjetjet tona nxjerrin në pah ndikimet e mundshme afatgjata të shtatzënisë në shëndetin e grave dhe rëndësinë e kujdesit për prindërit e rinj, veçanërisht për nënat e reja."/Talker - Syri.net