Gripi, ISHP: Infeksionet respiratore në rritje, kujdesuni për higjenën vetjake

Gripi, ISHP: Infeksionet respiratore në rritje, kujdesuni për higjenën vetjake

11:28, 20/01/2020

Instituti i Shëndetit Publik ka dhënë informacion mbi përhapjen e gripit në Shqipëri, ku ka vënë në dukje se prirja e infeksioneve respiratore paraqitet në rritje në javën e dytë të janarit.

“Nga të dhënat e raportimit sipas survejancës së infeksioneve akute respiratore të sipërme dhe të poshtme të sistemit ALERT, survejancës sentinel të sëmundjeve të ngjashme me gripin (ILI) në rrethin e Tiranës dhe survejancës së infeksioneve respiratore në spitalet kryesore në të gjithë vendin si dhe raportimit rutinë, Instituti i Shëndetit Publik informon se prirja e infeksioneve respiratore paraqitet në rritje në javën e dytë të 2020.

Prej fillimit të vitit në vend është evidentuar qarkullimi i viruseve A/H1pdm09, A/H3 dhe B të gripit.

Prej javës 43 deri në javën 02 janë grumbulluar 216 mostra nazofaringeale nga qendrat e survejancës.

Nga testimi i tyre në 27 (12.5%) mostra janë identifikuar viruset e gripit, nga të cilat: 19 (70.4%) virusi i tipit A dhe 1 (29.6%) virusi i tipit B.

Nga 19 viruset e tipit A 13 (68.4%) janë të nëntipit A/H1pdm09 dhe 6 (31.6%) të nëntipit A/H3, pra edhe në Shqipëri  vihet re mbizotërim i virusit të gripit A/H1pdm09.

ISHP bën me dije se aktiviteti i virusit të gripit, shpërndarja dhe tipi apo nëntipi dominant për kontinentin evropian janë po të njëjtit me vendin tonë.

Në javën e dytë të 2020 aktiviteti i gripit në Evropë paraqet rritje, pavarësisht se shumica e vendeve raportojnë aktivitet bazë ose të ulët. Që nga fillimi i sezonit mbizotërojnë viruset e tipit A dhe tipit B.

Instituti i Shëndetiti Publik fton të gjithë qytetarët të kujdesen për higjenën vetjake dhe të informohen për kujdes ndaj gripit dhe të ftohtit në faqet zyrtare të këtij institucioni, ku që prej fillimit të sezonit të gripit ka nisur sensibilizimin me  këshilla dhe orientim për periudhën e sezonit të gripit.”

© SYRI.net

Lexo edhe:

Komentet

Shto koment

Denonco