Presion i turpshëm ndaj një nëne/ Vuçiç le nam live në televizion, studentët: Po jetojmë në ferr

Gjatë një vizite të presidentit serb Aleksandar Vuçiç në qytetin e Bor, një takim me qytetarë u shndërrua në një skenë të rëndë dhe emocionalisht të ngarkuar.

Një banore lokale, Gordana Kariç, mori fjalën për të folur mbi vështirësitë që po has në sigurimin e ndihmës sociale për djalin e saj të sëmurë, i cili ka kaluar disa operacione dhe vuan nga probleme me zemrën. Ajo deklaroi se prej nëntë muajsh nuk ka marrë asnjë mbështetje nga sistemi social.

Në vend që të jepte një përgjigje të drejtpërdrejtë për çështjen e ndihmës, presidenti foli për procedurat dhe kontrollet e qendrave sociale, duke sugjeruar se mund të ekzistojnë pengesa ligjore për realizimin e pagesave.

Sipas raportimeve, edhe pse gruaja kërkoi të mos diskutonte çështjet familjare në praninë e fëmijës, presidenti e inkurajoi të fliste hapur për situatën, me arsyetimin se problemi mund të zgjidhej menjëherë.

Nën presion emocional, ajo shpërtheu në lot dhe zbuloi publikisht se nuk është nëna biologjike e djalit, por halla e tij, pasi nëna e fëmijës ka ndërruar jetë. Ajo tha se prej 13 vitesh kujdeset për të dhe ka tentuar të fitojë statusin e prindit ligjor, por kërkesat e saj janë refuzuar vazhdimisht.

Pas rrëfimit, Vuçiç e përshkroi situatën si të ndërlikuar për shkak të procedurave administrative dhe premtoi se do të përpiqet të ndërhyjë për ta zgjidhur çështjen, duke i dhënë asaj një afat përgjigjeje deri të mërkurën. Ai gjithashtu theksoi se, pavarësisht statusit ligjor, ajo “është nënë për djalin, sepse kujdeset për të”.