Deputetja britanike, Alicia Kearns ka deklaruar se ka mungesë të plotë të ekuilibrit në marrëdhëniet e Bashkimit Evropian me Kosovën.

Kështu është shprehur ajo në rrjete sociale, pas deklaratave të zëdhënësit të BE-së, Peter Stano, ku kishte kritikuar Kosovën për mungesë të sjelljeve evropiane.

Kearns po ashtu ka shpërndarë videon me deklaratën e zëdhënësit të BE-së, e ku ka renditur edhe disa fakte të sjelljeve joevropiane të Serbisë, që nga pushtimi rus i Ukrainës.

“Zëdhënësi i BE-së tregon mungesën e plotë të ekuilibrit në marrëdhëniet e BE-së me Kosovën. Të thuash që Kosova ka ‘paaftësi për t’u sjellë në mënyrë evropiane’ është një keqinterpretim i rëndë, por më pas të mos përmendësh veprimet e Serbisë në listën e dhënë më poshtë?”, ka shkruar ajo derisa ka etiketuar diplomatin evropian Josep Borrell.

Në listën e publikuar nga ajo pëmendet blerja nga Serbia e 20 mijë dronëve kamikazë nga Irani, ndërhyrja në zgjedhjet në Kosovë, vizita e ministrit të Jashtëm serb në Moskë, kidnapimi i 3 policëve të Kosovës, refuzimi për vendosje të sanksioneve ndaj Moskës dhe Teheranit e të tjera.

Reagimi i Kearns erdhi pasi Stano, në një konferencë për media tha se ndërmarrja e veprimeve ndaj Qeverisë së Kosovës ka ndodhur për shkak “të paaftësisë të autoriteteve kosovare që të sillen në mënyrë evropiane”, duke mos treguar se kur dhe nëse do të hiqen ato.

“Qasja jonë është e balancuar. Sigurisht të gjitha masat janë të kthyeshme, e varet në mënyrën se si sillën partnerët sa i përket çështjes së deeskalimit dhe ecjes para për t’u kthyer në proces normal të dialogut”, u shpreh ai.

Stano theksoi se në këtë kontekst, nëse SHBA-ja sinkronizojnë qëndrimet dhe shohin se duhet të merren masa edhe ndaj Serbisë, atëherë do të ndodhë.

.@JosepBorrellF’s spokesperson demonstrates the complete lack of balance in the EU’s dealings with Kosovo.

To say 🇽🇰 has “inability to behave in a European manner" is a gross misrepresentation, but then not to call out Serbia’s actions given list below?pic.twitter.com/xRsqRj5bD0 pic.twitter.com/f5PRIaXBhP

— Alicia Kearns MP (@aliciakearns) August 14, 2023