Rada Trajkoviq, këshilltare e ministrit për Komunitete dhe Kthim në Qeverinë e Kosovës, Nenad Rashiq, barrikadimin e veriut e lidhë me rastin e vrasjes së politikanit serb, Oliver Ivanoviq.

Trajkoviq, në një intervistë për Danas shtroi pyetjen se a janë barrikadat në veri të Kosovës abuzim i njerëzve nga ana e Beogradit për t’i mbrojtur vrasësit e Ivanoviqit. Ajo thotë se njerëzit janë të detyruar t’i bllokojnë rrugët, përcjell Gazeta Express.

 “Ajo që dëgjuam, pamë dhe u botua në SHBA, se Zvonko Veselinoviq dhe Milan Radoiçiq u quajtën grup kriminal rajonal, pothuajse i nivelit ndërkombëtar, është diçka që tregon statusin e tyre, siç i percepton Amerika – mafia më klasike”, thotë Trajkoviq.

Ajo tha se Veselinoviq dhe Radoiçiq kanë “marrëveshje fitimprurëse me qeverinë e Ana Bërnabiqit”.

“Këto janë të gjitha gjëra për të cilat flitet pak, dhe unë vazhdimisht përpiqem dhe dua që këta njerëz ta dëshmojnë pafajësinë e tyre në atë që të gjithë serbët në Kosovë e dinë dhe e besojnë, që është përfshirja në vrasjen e Oliver Ivanoviqit”, tha Trajkoviq.

Lidhur me pretendimet e presidentit serb, Aleksandar Vuçiq se ai nuk i ka urdhëruar serbët të krijojnë barrikada, Trajkoviq tha:

“Epo, mendoj… Ai dëshiron të thotë se Radoiçiq është shkëputur nga pushteti. Sikur edhe Veselinoviq. Mirë. Le ta vërtetojë duke i arrestuar. Le të bëjë marrëveshje me forcat e sigurisë së KFOR-it dhe le ta përdorë sistemin e sigurisë për qëllime të dobishme… Kjo është e vetmja mënyrë që ai të na tregojë se distancohet nga njerëz të tillë”.

Trajkoviq beson se Vuçiq frikësohet nga Veselinoviqi dhe Radoiçiqi.

Çështjen në veri të Kosovës, Trajkoviq tha se Serbia nuk mund ta zgjidhë “me asnjë ushtri, me kërcënime, me asnjë barrikadë”./express/