SYRI TV/ Juglindja e izoluar prej 5 ditësh, asnjë afat se kur mund të hapet rruga, drejtuesit fajësojnë reshjet e shiut

Autoritetet shtetërore nuk kanë dhënë asnjë afat se kur mund të hapet rruga që lidh juglindjen me pjesën tjetër të vendit. Pas 5 ditësh izolimi për shkak të shembjes, disa nga drejtuesit e institucioneve të linjës dolën para gazetarëve dhe fajësuan reshjet e shiut për shembjet duke shmangur përgjegjësitë për ndërtimet pa cilësi të këtyre rrugëve.

Syri TV

Izolimi i juglindjes së Shqipërisë për shkak të shembjes së rrugëve, do të vijojë për afat të pacaktuar. Disa nga krerët më të lartë të institucioneve të linjës, dolën para gazetarëve në përpjekje për të shpjeguar arsyet e shembjes së aksit Librazhd-Përrenjas e cila ka izoluar prej 5 ditësh një pjesë të mirë të vendit. Drejtori i ARRSH Ami Kozeli tha se do të ndërtohet një rrugë alternative buzë Shkumbinit por nuk kishte një datë se kur do të normalizohet qarkullimi në këtë aks strategjik të Shqipërisë.

Teksa nuk kishin një datë se kur do të hapet rruga për qarkullimin e mjeteve, drejtuesit e këtyre institucioneve, deklaruan në unison se shkak për situatën dramatike me të cilat po përballet ky aks por dhe rrugët e tjera të vendit, lidhet me reshjet e shiut, në përpjekje të qartë për të shmangur përgjegjësitë që lidhen me ndërtimet pa cilësi të këtyre rrugëve, të cilat u kanë kushtuar taksave të shqiptarëve me qindra milion euro.

Shembja e rrugës Librazhd – Përrenjas ka shkaktuar edhe bllokim të plote të qarkullimit të mallrave. Teksa me dhjetëra kamionë kanë mbetur në pikën doganore të Qafë Thanës, drejtori i doganave dha si zgjidhje për situatën kalimin e tyre nga Dogana e Bllatës në Dibër.

Zëvendësministri i Infraskturës dhe energjisë Hantin Bonati shmangu përgjigjen e pyetjes së Syri TV mbi përgjegjësitë politike të qeverisë ndaj kësaj situate të rëndë e cila po shkakton dëme të shumta ekonomike dhe sociale për shkak të bllokimit total të qarkullimit në këtë rrugë.