Deklarata e sotme e Komisioneres së Zgjerimit, znj. Marta Kos, mbi zgjedhjet e 11 majit 2025 nuk është vetëm e pavërtetë, por përbën një shtrembërim të papranueshëm të Raportit Përfundimtar të ODIHR. Si nënkryetar i Partisë Demokratike, jam i detyruar të reagoj, sepse kur një zyrtare e lartë e BE-së i atribuon Bashkimit Europian një konkluzion që ODIHR nuk e ka thënë kurrë, rrezikohet jo vetëm korrektësia profesionale, por edhe vetë besueshmëria e institucioneve europiane në sytë e qytetarëve shqiptarë. ODIHR ka qenë i qartë dhe i prerë; zgjedhjet nuk kanë qenë as të lira, as të ndershme. Prandaj çdo deklaratë që përpiqet ta zbukurojë apo ta hollojë këtë të vërtetë, duhet çuar menjëherë në vend.

Reagimi i deputetit te PD, Oerd Bhlykbashi:

Komisionerja e Zgjerimit znj. Marta Kos deklaroi se zgjedhjet e 11 majit 2025 “kanë qenë të lira e të ndershme”. Çfarë është më e rëndë është që ajo e dha si konkluzion të saj në emër të BE, jo si citim të ODIHR.

ODIHR në Raportin Përfundimtar ka deklaruar që në fjalinë e parë që “konkurentët nuk patën fushë loje të barabartë”.

Brenda paragrafit të parë, ODIHR thotë se “Partia në pushtet përfitoi nga përdorimi gjerësisht i burimeve administrative gjatë fushatës , duke krijuar avantazh të padrejtë për shkak të qenies në pushtet”.

Në asnjë rresht të raportit final, për asnjë moment, ODIHR nuk thotë që zgjedhjet ishin të lira e të ndershme, siç thotë znj, Kos.

Ajo që ODIHR tha prerazi ësjtë se është prishur ndarja mes shtetit dhe partisë në pushtet. Kjo është shkelje e një parimi themelor, që sjell një fushë loje të pabarabarta, pra zgjedhje janë të pandershme.

Zgjedhësit patën presion, thotë ODIHR. Pra zgjedhjet nuk ishin as të lira.

Kreu i delegacionit të Parlamentit Europian në kuadër të Misionit Ndërkombëtar të Vëzhgimit të Zgjedhjeve, eurodeputeti Gahler, nënvizoi qartë se krimi i organizuar pengoi rotacionin politik.

Sa kohë nuk ka një raport tjetër dhe Komisioni Europian nuk kishte misionin e vet të vëzhgimit, pyetja ime është: E ka lexuar raportin e ODIHR dhe nese po, ku e lexoi Komisionerja e Zgjerimit, znj. Kos shprehjen se “zgjedhjet ishin të lira e të ndershme”?!

Znj. Kos, si Komisionere Zgjerimi nuk ka kompetencë të zgjerojë dhe as të tresë Raportin Përfundimtar të ODIHR. Duhet patjetër ta tërheqë menjëherë atë deklaratë. Herë tjetër mjafton vetëm të citojë raportin e ODIHR.