Kosova shkon në zgjedhje të jashtëzakonshme më 28 dhjetor

Presidentja e Kosovës, Vjosa Osmani ka vendosur që zgjedhjet e jashtëzakonshme parlamentare të mbahen më 28 dhjetor 2025.

Këtë e bëri të ditur në një konferencë për media, pas takimit konsultativ që pati sot me partitë politike parlamentare.

Osmani fillimisht nënshkroi dekretin për shpërndarjen e Kuvendit të Kosovës, respektivishit legjislaturën e nëntë të tij.

Ky vendim vjen pas dështimit të mandatit të dytë të Glauk Konjufcës për formimin e qeverisë.

Presidentja e Kosovës, Vjosa Osmani, ka shpërndarë sot Kuvendin e Republikës së Kosovës, pas konfirmimit zyrtar nga Kuvendi se edhe mandatari i dytë ka dështuar të krijojë Qeverinë. Vendimi është marrë në përputhje me Kushtetutën dhe legjislacionin në fuqi, ndërsa shënon përfundimin e Legjislaturës së nëntë.

Me shpërndarjen e Kuvendit, Kosova hyn automatikisht në proces zgjedhor, ndërsa presidentja pritet të shpallë së shpejti datën e zgjedhjeve të parakohshme parlamentare.

Shpërndarja e Kuvendit vjen pas një krize të zgjatur politike që nisi me pamundësinë e partive politike për të siguruar shumicën e nevojshme parlamentare për formimin e ekzekutivit të ri.

Mandatari i parë i propozuar nga Presidentja, Albin Kurti, lideri i Lëvizjes Vetëvendosje nuk arriti të sigurojë votat për krijimin e Qeverisë. As mandatari i dytë, Glauk Konjufca i propozuar nga LVV, po ashtu dështoi të formojë shumicën, çka e aktivizoi automatikisht nenin kushtetues për shpërndarje të Kuvendit.

Sipas Kushtetutës, në rast të dështimit të dy mandateve radhazi, presidentja është e obliguar të shpërndajë Kuvendin dhe të shpallë zgjedhjet e reja brenda afateve ligjore, më së largu 40 ditë nga dita e sotme. Kjo është hera e parë në Kosovë që dështojnë dy të mandatuar për të formuar qeverinë.