Sekretariati i Etikës ka vendosur të anulojë votimin e ligjeve të seancës plenare të 7 marsit.

Opozita kishte kërkuar që ligjet e votuara në seancën e 7 marsit të anuloheshin pasi nuk ishte plotësuar kuorumi me deputetët në parlament.

Opozita kërkoi anulimin e votimit të pesë projektligjeve të seancës plenare të 7 marsit për shkak të mungesës së kuorumit, një precedent i pandodhur më parë. 

Në seancën plenare të 7 marsit, nënkryetarja e Kuvendit, Ermonela Felaj injoroi protestën me pankarta dhe bilbilë të deputetëve të opozitës dhe hodhi për votim pesë projektligje, mes të cilave edhe propozimin kontrovers për shtyrjen e afatit të ligjit për Investimet Strategjike deri më 31 dhjetor 2024.

Deputetët socialistë ngritën kartonët jeshilë dhe brenda pak minutash, ligjet u konsideruan të miratuara. Procesi i votimit vazhdoi edhe pasi deputetët e opozitës i kujtuan drejtueses së seancës, Felaj, se nuk kishte kuorumin e nevojshëm për të vazhduar me procesin e votimit.

Por videot e transmetimit të seancës tregojnë Felajn teksa këmbëngul se ishte kuorumi i nevojshëm si në nisje të seancës, ashtu edhe gjatë procesit të votimit.