Kreu i Grupit Parlamentar të Partisë Demokratike, Gazment Bardhi, është shprehur se është në kontakt të vazhdueshëm me deputetët e PD-së që po qëndrojnë në krahun e Lulzim Bashës.

Komentet Bardhi i bëri në emisionin “Now me Erla Mëhillin” në Euronews Albania, ku tha se deputetët demokratë që qëndrojnë krah Bashës, duhet t’i kthehen rolit të tyre të të bërit opozitë ndaj qeverisë së kryeministrit Edi Rama dhe jo të bëjnë opozitën e opozitës.

“Kolegët besojnë një zhvillim të caktuar brenda PD-së. Unë e mirëkuptoj, por në gjykimin tim është e gabuar dhe sa më shpejtë ta kuptojnë, aq më shumë i shërbejnë interesit publik dhe interesit të Shqipërisë. Unë kam miq shumë të mirë deputetë që nuk i janë bashkuar këtij bashkimi që ka ndodhur tani në PD dhe në grupin Parlamentar.

Pjesën dërmuese të tyre unë i kam miq, janë çdo ditë të lirë të na bashkohen. Unë qëndroj me ta, diskutoj me ta. E kam bërë edhe me kolegët që ishin rreshtuar që ditën e parë krahë Berishës. Edhe gjatë kohës që PD ishte në konflikt mes vetes, unë bisedoja për shqetësimet e përbashkëta.

E rëndësishme është që i gjithë grupi i PD-së, është i bashkuar në pjesën dërrmuese të tij, strukturat janë të bashkuara dhe unë pres që të gjithë kolegët t’i kthehen rolit të të bërit opozitë me Ramën dhe të heqin dorë nga opozita për opozitën, sepse kjo nuk i shërben atyre”, tha Bardhi.