"Shqipëria është në gjendje të jashtëzakonshme, skandal pas skandali, gjendje dhune, korrupsion pas korrupsioni dhe kryeministri avullohet! Avullohet dhe nuk vjen në këtë parlament të japë llogari, - e ngriti zërin deputeti Tritan Shehu sot në Kuvend. -  Kjo nuk ndodh në asnjë parlament të botës. Kryeministri duhet të ishte atje dhe të shpjegohej me deputetët dhe të fliste me ata dhe jo të avullojë, të zhduket, e të komunikojë vendimet e mëdha strategjike nga Mali i Zi e t’i shmanget. E paimagjinueshme kjo. Ndaj ky parlament kërkon që të fillojet me këtë gjë: me kryeministrin atje, me debat dhe një mocion për këtë situatë kaq të rëndë që po kalon e gjithë Shqipëria!"

Pas këtyre fjalëve, deputetët e PD-së janë ngritur në këmbë në Kuvend në mesditë duke kërkuar me ngulm praninë e kryeministrit Edi Rama për të gjitha skandalet e fundit, ndërkohë që zëri i kryetares së Kuvendit Lindita Nikolla vazhdonte në mikron të njoftonte dhënien e mandatit të ish-deputetit Rrahman Rrahja, një deputeti të ri të PS, Arkend Ballës.

Ndërsa Nikolla vazhdonte të thërriste deputetin për të bërë betimin, deputetët e opozitës rrethuan foltoren dhe godisnin me forcë tryezat e tyre, për të kundërshtuar indiferencën e qëllimshme që po tregohej ndaj kërkesave të tyre. 

Deputeti demokrat Korreshi e konsideroi të turpshme sjelljen e Nikollës, që u caktonte radhën e fjalës së deputetëve. Ai kërkoi Kryeministrin në sallë: “Shokun Edi Rama, se na mori malli njëherë ta shohim.

“Ta përqafojmë” njëherë naltmadhninë, të marrë defin e t’i bashkohet kabasë atje në Myzeqe se na mbytën plehrat nga ata inceneratorët që nuk ndizen dhe ata që dhanë lekë, arratisen.” 

Protesta e sotme e opozitës është e disata e kësaj natyre, pasi rregullisht kreu i Qeverisë, Edi Rama, refuzon t'u përgjigjet deputetëve dhe e shmang ardhjen në seancë sa herë ngrihen probleme të mëdha./ar.sh/SYRI.NET