Mbrëmja e 6 qershorit duke u gdhirë 7 qershori, ishte nata e parë në qeli, për ish-kryebashkiakun e Durrësit, Vangjush Dako, i arrestuar me urdhër të SPAK  për akuzën e shpërdorimit të detyrës në dy raste.

Ndaj Vangjush Dakos, 4 ish-zyrtarëve të Drejtorisë së urbanistikës së Bashkisë së Durrësit, ish-drejtorit Adhurim Qehajaj dhe pronarit të një kompanie ndërtimi, Fiqiri Farrukut, është firmosur masa e sigurisë “arrest me burg”, ndërsa për tre nëpunëse gra është vendosur masa ‘arrest shtëpie’.

Gjatë 10 viteve të qeverisë socialiste, janë arrestuar dhjetëra deputetë e kryebashkiakë. Lefter Alla, kryebashkiak i Bulqizës, është i fundit në listën e gjatë të të zgjedhurve socialistë të arrestuar për korrupsion apo vepra të tjera penale.

Kush janë kryebashkiakët e arrestuar?

Shpëtim Gjika-kryebashkiaku i Vlorës

Historia nisi me ish-kryebashkiakun e Vlorës Shpëtim Gjika, i cili u vu në pranga në vitin 2015, nën akuzën e dhënies së lejeve të paligjshme të ndërtimit.

Ai akuzohej për shpërdorim detyre, falsifikim të dokumentave, ndërtim të paligjshëm dhe për veprime që pengojnë zbulimin e të vërtetës.

Shukri Xhelili-ish kryebashkiaku i Dibrës

Xhelili i dënua me 1 vit e 8 muaj burg për akuzën “marrëdhënie seksuale ose homoseksuale duke shpërdoruar detyrën”. Ai u lirua nga qelia më 30 qershor 2017.

Ish-kryebashkiaku i Vorës, Agim Kajmaku

Pasi u zgjodh në krye të bashkisë më 30 qershor 2019 ai u denoncua nga PD për fshehjen e dënimit. Kjo akuzë u vërtetua nga prokuroria e Tiranës e cila mori informacione nga autoritetet greke. Në një letërporosi autoritetet greke konfirmuan se ai ishte në kërkim në 2003 për falsifikim të kartëmonedhave dhe nuk ishte arrestuar pasi kishte ikur në Shqipëri.

Ish-kryebashkiaku i Lushnjes, Fatos Tushe

Tenderi ishte dhënë në mënyrë të paligjshme për ndërtimin e një kanali vaditës dhe sot Tushe ndodhet në burg.

Ish-kryebashkiaku i Bulqizës, Lefter Alla

Gjithashtu në pranga kanë rënë dhe zyrtarë të tjerë bashkie, ministrie apo digasteresh të ndryshme.

Kur do arrestohet Majlinda Bufi?!

Kryetari i PD-së së Roskovecit, Emels Xhaxhaj depozitoi dy javë para zgjedhjeve të 14 majit një kallëzim penal në organet e drejtësisë shqiptare, për kryebashkiaken socialiste Majlinda Bufi. Kjo e fundit akuzohet nga përfaqësuesi i PD për “Shpërdorim detyre” dhe “Shkelje të barazisë në tendera”.

Referuar dokumentit të dalë nga Prokuroria e Përgjithshme, thuhet se ky kallëzim penal i është dërguar për kompetencë SPAK, referuar parashikimeve të nenit 75/a të Kodit të Procedurës Penale në lidhje me kompetencën lëndore.

Kryetari i PD në Roskovec, Emels Xhaxhaj thotë se tri procedura prokurimi kanë shkelje dhe akuzon personat përgjegjës, me në krye Majlinda Bufin, se veprimet dhe mosveprimet e kryera nga personat e cituar në këtë kallëzim, përbëjnë vepra penale.

“E kemi dorëzuar kallëzimin në SPAK. Një tender është diku te 200 mln të vjetra e një tjetër 24 mln të vjetra. Janë për rikonstruksion rrugësh, shkollash. Tani e pamë të arsyeshme që të depozitonim kallëzimin në SPAK. Shpresoj që të merret në konsideratë dhe zonja Bufi të merret si e pandehur dhe të japë llogari se si i ka zbatuar kontratat”, u shpreh Emels Xhaxhaj ditën që depozitoi kallëzimin.

Majlinda Bufi drejton Bashkinë e Roskovecit prej vitit 2015. SPAK ka hapur ndaj saj një hetim penal për shpërdorim detyre dhe intimidim të votueseve sic u pasqyruar në audio përgjimet e publikuara nga emisioni investigativ “Piranjat”.

Prokuroria e Posaçme kundër krimit dhe korrupsionit (SPAK) deri në këto momente po thërret dëshmitarët dhe ka kërkuar material lidhur me skandalin e kryebashkiakes së Roskovecit, Majlinda Bufi, e cila është shfaqur në disa video duke kërcënuar qytetarët. Emisioni ‘Piranjat’ janë plotësisht të gatshëm të vëmë në dispozicion çdo informacion, por ende s’ka asnjë kërkesë nga SPAK.

Manipulimi i votës dhe shkelja e ligjit janë plotësisht të dokumentuara. Ditën e sotme do të bëhen publike një tjetër audiopërgjim, ku Bufi është kapur sërish në flagrancë duke shkelur ligjin.

Këto përgjime ia kanë prishur qejfin Edi Ramës dhe pritet që shumë shpejt t’ia dorëzojë Bufin drejtësisë së re që udhëhiqet nga SPAK./ timoni.al/