Kryetari demokrat, Sali Berisha, rezervoi të tjera akuza ndaj ambasadores amerikane, Yuri Kim gjatë konferencës për shtyp të fundjavës.

“Unë garantoj qytetarët shqiptarë se të gjitha përpjekjet e Edi Ramës, dhe në këtë rast të McGonigalit me fustan, që janë evidente, i ka pranuar vetë, ndërhyrje në gjykatë, do kenë si fund dështimin e turpshëm.

PD është parti që ka një kauzë të drejtë, një kauzë që është njëkohësisht kauza e mbarë shqiptarëve, që duan një Shqipëri demokratike.

PD shkon në këto zgjedhje si një forcë më e lirë në historinë e saj. Për herë të parë ajo shkon me kandidatura të dala me votën e anëtarëve dhe simpatizantëve të saj, pra kandidaturat të lirisë.

Këto janë arsyet e këtij starti entuziast, që do shndërrohet në cunam për të arkivuar monizmin e Edi Ramës dhe shërbimet ndaj tij të Lulzim Bravës dhe Alibashës,” tha Berisha.

“Në 90 përqind të garave elektorale, demokratët kanë shkuar në zgjedhje me logo koalicioni. Kjo është e vërteta.

Ajo që thoni ju, nuk ka sot demokratë të vërtetë, nuk ka sot qytetarë shqiptarë që nuk dënon me neveri të madhe, aktin e shëmtuar të Edi Ramës, i cili mendoi se do të caktojë vetë drejtuesit e opozitës me ndihmën e guvernatores Yuri Kim, që ka 6 javë që nuk u thotë shqiptarëve një fjalë të vetme për aferën Rama-McGonigal.

A ka një detyrim zonja t’u thotë dy fjalë shqiptarëve për këto, e cila ka folur për çdo gjë, edhe për hënën, qiellin, diellin, për mbjelljen, korrjet. Ky është një superskandal. Ky është një Uotergejt i shekullit të 21-të me përmasa shumë të mëdha.

A i patë ju, të ulur, Damian Gjiknuri, a e dini ju se Gjiknuri ka qenë shoqëruesi më kryesor i McGonigal në Shqipëri? A e dini ju se Gjiknuri me Ballën, pasi kanë rrjepë me gjoba në Tiranë, kanë nisur të vjelin gjoba edhe në Elbasan? A e dini që dërgoi në Tropojë për të marrë titullin e Qytetarit të Nderit një tradhtar amerikan?

Ndaj e ftoj zonjën të bëjë një transparencë të plotë, të dënojë këtë veprimtari të kësaj qeveri, të paktën në termat e asaj që gjykata e SHBA i ka nxjerrë. Nuk e bën dot, unë e kuptoj sepse është vetë pjesë e problemit,” theksoi kreu i PD.