Kryetari demokrat, Sali Berisha foli për disa çështje gjatë konferencës së fundjavës.

I pyetur se përse e përmendi emrin e Taulant Ballës, kur foli për rastin e vrasjes barbare të kenianes Xhoi, Berisha tha se këtë çështje do e ndërkombëtarizojnë.

“Krim-ministri Edi Rama do mbajë përgjegjësi personale. Rastin e vajzës nga Kenia, ne do e bëjmë çështje ndërkombëtare.

Ta dijë Edi Rama, të mos fshehë në qeveri vrasësit, por të dalë se nuk mund të vriten njerëzit në atë mënyrë. Vrasësi fshihet nga qeveria dhe kjo është një gjë shumë e rëndë.

Jam marrë dhe po merrem me këtë, por qëndrim më kriminal që ka mbajtur policia, nuk mund të gjendet. Kjo sepse vrasësit flenë në qeveri,” tha Berisha.

Kreu demokrat e kishte një koment edhe për të ashtuquajturën ‘çështje e vulës’.

“Alibasha është një zëdhënës mjeran i Edi Ramës. Edhe njëherë, sqaroj shqiptarët: PD nuk ka asnjë problem as me gjykatën, as me logon. Ka një vendim gjykate, të 25 marsit 2022, që konsideron legjitime të gjithë dokumentet, ndryshimet në statut, e gjithë procedura e Kuvendit të 11 dhjetorit.

Edi Rama mban peng përmes kancelarit regjistrimin e këtij vendimi në regjistrin e forcave politike. Në bashkëpunim me ambasadoren Kim dhe Erion Veliajn, ka ndërhyrë për të shpallur palë, atë që nuk është palë.

Këta treguan se nuk kanë asnjë parim, asnjë moral për ligjin. Akti i vetëm i asaj gjykate është të konstatojë se ai që ankohet është një skllav i mjerë i Edi Ramës dhe nuk ka asnjë legjitimitet në kërkesën e tij,” tha Berisha.

Berisha u shpreh sot është normale që partitë e vogla të opozitës të kërkojnë të dalin më vete në zgjedhjet lokale, për të testuar se çfarë numri votash kanë. Ai u shpreh i rezervuar lidhur me mundësinë që PDIU të kalojë nga e majta, teksa tha se çamët nuk duhet të afrohen me nipin e Spiro Kolekës.