Gazetari Bledian Koka bën përgjegjës Lulzim Bashën për krizën që ka përfshirë Partinë Demokratike. 

Në 'Task Force' me Sonila Meçon në Syri Tv, Koka komentoi edhe deklaratën e ambasadores Yuri Kim një ditë më parë, duke shtuar se PD me Sali Berishën në krye do të vendosë raporte institucionale me ambasadën e SHBA në vendin tonë. 

"Shkaktari real i krizës, po të doni edhe kumbari i asaj që po ndodh në PD, është vetë zoti Basha. Dëgjova deklaratën kur tha për shkak të vendimit të SHBA. Vendimi i SHBA e ka bërë efektin e vet, Sali Berisha nuk do të udhëtojë për ca kohë drejt SHBA. Ça lidhje ka ky vendim i SHBA se çfarë ndodh brenda PD dhe çfarë do të diskutojë Kuvendi. Deklaratën e ambasadores dje e lexova ndryshe. Kuptova që nëse z.Berisha do të zgjidhet kryetar i PD, ai nuk do të ketë shansin që të pijë kafe me ambasadoren amerikane. Një kryetar i PD nuk duhet të jetë kryetar i PD për të pirë kafe me ambasadoren e amerikës, por të ketë raporte institucionale. Dhe raportet institucionale apo përjashtimi i raporteve institucionale mes ambasadës amerikane dhe PD me Sali Berishën në krye nuk pashë që të artikulohej aty", tha Koka.