Është përcjellë për në banesën e fundit aktori i njohur Birçe Hasko.

Në Teatrin Kombëtar të Operas dhe Baletit, u mbajtën homazhet në nder të tij, aktori i cili u nda nga jeta një ditë më parë. Përcjellja për në banesë e fundit do të jetë në vendlindje, në Dukat të Vlorës.

Aktori i njohur i kinematografisë shqiptare, u nda nga jeta në moshën 84-vjeçare. Milo Tafani te “Shi në Plazh”, ishte roli më i realizuar i mjeshtrit të madh Birçe Hasko, në mesin e interpretimit të mbi 12 roleve në teatër.

Studentët në një mesazh ngushëllimi thanë se do e kujtojnë gjithmonë për përkushtimin e tij.

"IKU" PËR NË PAQE DHE PROFESOR BIRÇJA.
Profesor Birçe Hasko mbetet një prani emblematike në Artin Shqiptar, të cilit i kushtoi gjithë jetën e Tij. Profesor Birçja mori pjesë në dhjetëra shfaqje dhe filma, duke bashkëpunuar me regjisorë kryesorë shqiptarë dhe duke lënë gjurmën e Tij dalluese në skenë dhe ekran, me ndjeshmëri, qëndrueshmëri dhe përkushtim ndaj artit të aktrimit.
Kontributi i Tij në edukimin e brezave të rinj të aktorëve ishte gjithashtu i rëndësishëm. Profesori dha mësim për 38 vjet në degën e Artit Dramatik të Universitetit të Arteve.
Teatri Shëtitës   "Çajupi"  me trishtim të pamasë, i jep lamtumirën e fundit Profesor Birçes dhe i përulet me mirënjohje të pamasë për atë që na ofroi, për personalitetin e ndritshëm me moral të rrallë...  Pushoni në paqe Profesor... Përqafimi i yjeve ju pret...

Birçe Hasko lindi në Dukat të Vlorës në 15 mars 1942. Në teatër ka interpretuar mbi 12 role. Roli i tij më i realizuar është ai i Milos në komedinë “Shi në plazh” shkruar nga Teodor Laço.

Po ashtu një kontribut të çmuar ka edhe në kinematografinë shqiptare, ku ka interpretuar me dhjetëra role. Roli i tij i parë në kinematografi është në vitin 1971 në rolin e ballistit në filmin “Kur zbardhi një ditë”.

Më tej do të vazhdonin rolet e tij në shumë filma si ai i Mete Jahos tek filmi “Radiostacioni” në vitin 1979, roli i Syrjait në filmin “Skëterrë 43” në vitin 1980, roli i mesuesit në filmin “Gurët e shtëpisë sime” në vitin 1985 si dhe shumë role në filma të tjerë për të mbërritur në rolin e tij më të fundit në filmin “Kronikë Provinciale” në vitin 2009. Në vitin 1995, mori titullin Profesor.

Në vitin 1976, urdhri “Naim Frashëri”, klasi i dytë , në vitin 1988 “Artist i Merituar”. 18 Prill 1987, Medaljonin e Festivalit për interpretimin e rolit të Dajës në filmin “Dhe vjen një ditë” në Festivalin e VII-të të Filmit Shqiptar të zhvilluar në Tiranë nga data 13 deri në 18 prill të vitit 1987. 22 Prill 1989, Çmimi i III-të për interpretimin e rolit të Babait të Danës në filmin “Shkëlqim i përkohshëm” në Festivalin e VIII-të të Filmit Shqiptar të zhvilluar në Tiranë nga data 18 deri më 22 prill të vitit 1989. Në vitin 2002 merr titullin “Mjeshtër i Madh” ne vitin 2007 shpallet “Qytetar Nderi” i Orikumit.