Kthehet në Pompei Mozaiku romak i vjedhur nga një oficer nazist gjatë Luftës së Dytë Botërore

Një panel mozaiku i epokës romake me motiv erotik është rikthyer zyrtarisht sot në Parkun Arkeologjik të Pompeit, më shumë se tetë dekada pasi u zhduk gjatë Luftës së Dytë Botërore.

Vepra unike, e krijuar mbi pllaka travertine dhe që daton nga fundi i shekullit I para Krishtit deri në shekullin I pas Krishtit, ishte vjedhur nga një oficer nazist gjerman dhe kishte përfunduar në pronësi private në Gjermani.

Trashëgimtarët e një qytetari të ndjerë gjerman, i cili kishte marrë mozaikun si dhuratë nga një kapiten i Wehrmacht-it, e dorëzuan atë në autoritetet gjermane, duke hapur rrugën për kthimin e tij në Itali. Përpjekjet e përbashkëta diplomatike midis Konsullatës italiane në Stuttgart dhe zyrtarëve gjermanë ishin kyçe për realizimin e këtij riatdhesimi të rëndësishëm kulturor.

Megjithëse vendndodhja e saktë origjinale e mozaikut në qytetin antik të Pompeit mbetet e paqartë, ekspertët thonë se vepra të ngjashme zbukuronin shpesh dhomat e gjumit ose hapësirat private të banesave romake. Paneli përfaqëson një shembull të rrallë të kalimit të artit romak drejt tematikave më intime dhe personale, larg mitologjisë heroike që dominonte më parë.

Arkeologët e konsiderojnë mozaikun si me “rëndësi të jashtëzakonshme kulturore”, jo vetëm për vlerën artistike dhe historike, por edhe për mesazhin që përcjell për jetën e përditshme dhe estetikën romake. Pas katalogimit dhe konservimit, ai do të bëhet pjesë e koleksionit të hapur për publikun dhe studiuesit në Pompeii.