Kasapi u gjet i varur, prokuroria e Ravenës kërkon 22 vite burg për shqiptarin

Prokuroria e Ravenna ka kërkuar dy dënime për vrasje në lidhje me vdekjen e kasapit 64-vjeçar Domenico Montanari, i cili u gjet i varur mëngjesin e 25 korrikut 2019 në dyqanin e tij në Faenza.

Prokurorët kanë kërkuar burgim të përjetshëm për të pandehurin kryesor, ish-polici bashkiak 57-vjeçar Gian Carlo Valgimigli, duke kërkuar gjithashtu që të mos i njihen rrethanat lehtësuese.

Ndërkohë, për bashkëpandehurin, 33-vjeçarin shqiptar Daniel Mullaliu, vëllai i ish-partneres së Valgimiglit, është kërkuar një dënim me 22 vite burg, me aplikimin e rrethanave lehtësuese.

Nga ana tjetër, mbrojtja ka kërkuar pafajësi për të dy të akuzuarit, ndërsa vendimi i gjykatës pritet në mesin e muajit qershor.

Çështja fillimisht ishte hetuar si ‘vdekje si pasojë e një krimi tjetër’, konkretisht e lidhur me fajde, pasi dyshohej se 57-vjeçari i jepte viktimës hua me interesa të larta.

Hetimi mori një kthesë pas dëshmive të një të burgosuri 59-vjeçar nga Afragola, i cili kishte rrëfyer se kishte marrë informacione në burgun e Ferrara nga Valgimigli për një vrasje të mundshme.

Edhe pse Prokuroria kishte kërkuar mbylljen e çështjes, vendimi i gjyqtarit për hetimet paraprake për të vijuar procedimin çoi çështjen në Gjykatën e Assizes.