Një 33-vjeçar është proceduar penalisht pasi hodhi mbetje inerte në trotuar, duke ndotur mjedisin dhe duke penguar lëvizjen e lirë të këmbësorëve.

Rasti u evidentua nga strukturat e Policisë së Vlorës gjatë monitorimit të territorit, në kuadër të kontrolleve për garantimin e rendit dhe parandalimin e paligjshmërive.

Pas verifikimeve në terren, u procedua penalisht shtetasi A. A., banues në Vlorë. Sipas policisë, ai kishte kryer punime rikonstruktimi në banesën e tij dhe më pas kishte hedhur inertet në hapësirën publike, duke rrezikuar sigurinë dhe qarkullimin e qytetarëve.

Materialet procedurale iu referuan Prokurorisë pranë Gjykatës së Juridiksionit të Përgjithshëm Vlorë për veprën penale “Menaxhimi i mbetjeve”, të parashikuar nga neni 201/a i Kodit Penal.

Paralelisht, Policia Bashkiake Vlorë e ka ndëshkuar 33-vjeçarin edhe me një gjobë administrative prej 20.000 lekësh, në bazë të legjislacionit për mbrojtjen e mjedisit urban.