Nuk iu pranua garancia pasurore - Apeli i GJKKO-së rrëzon kërkesën, Erion Veliaj mbetet në burg

Tiranë - Gjykata e Posaçme e Apelit për Korrupsion dhe Krim të Organizuar refuzoi sot garancinë pasurore dhe la në burg kryebashkiakun e Tiranës, Erion Veliaj.

Sot në Apelin e GJKKO-së, gjyqtarja Nertina Kosova shqyrtoi kërkesa e Veliajt për të ndryshuar masën e sigurisë, ‘arrest me burg’ në të cilën ndodhet prej 10 shkurtit 2025.

“Nga data 2 shkurt e deri tani nuk kishte asnjë provë të re’ informoi avokatja e caktuar kryesisht e Erion Veliajt, Valentina Teodoresku. 

Kryebashkiaku i Tiranës iu drejtua me ankim Apelit kundër vendimit të Shkallës së Parë të 1 shkurtit që u dha nga gjyqtarja Etleva Deda për vijimin e arrestit në burg ndaj tij.

Veliaj kërkoi masë më të butë se arresti në burg, duke ofruar garanci pasurore por as këtë herë kërkesa nuk iu pranua. 

Kërkesa e Veliajt erdhi menjëherë pasi Gjykata e Posaçme e Shkallës së Parë vendosi kalimin në gjykim të dosjes në ngarkim të tij.

Sipas SPAK, Veliaj dhe bashkëshortja e tij kishin ngritur një skemë të mirëorganizuar për përfitimim e rryshfeteve në këmbim të favoreve ndaj biznesmenëve për leje ndërtimi. Veliaj akuzohet për 5 vepra penale, përfshirë korrupsionin pasiv në 9 episode, shpërdorim detyre, mosdeklarim dhe fshehje pasurie, pastrim parash dhe futje e sendeve të palejuara në burg.