Vdes në një aksident në Athinë, një i ri shqiptar

Një nga dy të plagosurit në dy aksidentet rrugore që ndodhën në orët e para të së premtes në zona të ndryshme të Athinës ndërroi jetë nga plagët e rënda.

Ai është një 23-vjeçar nga Shqipëria. Aksidenti ndodhi kur automjeti që ai drejtonte në rrethana të paqarta doli nga rruga në rrugët ‘Lavriou’ dhe ‘Sounio’ pranë stadiumit ‘Markopoulos’, duke rezultuar në përplasjen e tij me barrierat rrugore.

I riu u plagos rëndë dhe u desh ndihma e pesë zjarrfikësve dhe dy automjeteve të zjarrfikësve për ta nxjerrë. Ai u dërgua fillimisht në Qendrën Shëndetësore ‘Markopoulos’ dhe më pas në Spitalin ‘Georgios Gennimatas’, ku u shpall i vdekur.

Më herët gjatë natës, një tjetër aksident trafiku ndodhi në orën 02:10 në Ilion, në rrugën Radiophonias pranë stadiumit. Dy makina u përplasën, duke rezultuar në plagosjen e dy 21-vjeçarëve me origjinë greke.