Vrasja e Artur Tushit/ Autori doli nga burgu në Venezuelë vetëm për të kryer ekzekutimin, do paguhej 35 mijë USD

SEMANA

Të enjten, në orën 14:00, është caktuar seanca gjyqësore në të cilën avokatja Manuela Toro Correa, mbrojtësja e personit të arrestuar për vrasjen e shqiptarit Artur Tushi në Kolumbi, do të kërkojë që klientit të saj t’i jepet arrest shtëpie.

Ai quhet Álvaro José Cabrera Azocar, është 35 vjeç dhe ka një të kaluar të gjerë kriminale në Venezuelë, vend ku ka lindur më 12 prill 1990.

Aktualisht ndodhet në paraburgim në stacionin e policisë në Bello, ndërsa pritet të vendoset fati i tij, edhe pse ai tashmë ka qenë i prerë para gjykatës, ku ka mohuar të jetë përgjegjës për vrasjen e Tushit.

Megjithatë, prokuroria deklaroi se ka mjaftueshëm prova për të treguar të kundërtën dhe i ka ngritur atij katër akuza të rënda: vrasje e rënduar, tentativë vrasjeje, mbajtje e paligjshme e armëve të zjarrit, falsifikim i shenjave identifikuese.

Këto akuza lidhen me faktin se në atentatin që ndodhi të dielën, më 5 tetor, ku u vra shqiptari Tushi — i cili mori 11 plumba në kraharor, në gishtin tregues të dorës së majtë dhe në pjesën lumbare — u plagos edhe një grua 77-vjeçare që po kalonte në këmbë në vendin ku ndodhi ngjarja.

Gjithashtu, sepse ai u kap me një pistoletë industriale tip Smith & Wesson, kalibër 9 mm, me një karikator dhe shtatë fishekë të papërdorur, si dhe me një motoçikletë marke Dominar, me të cilën u përpoq të arratisej.

E gjithë kjo është e dokumentuar në dosjen që revista SEMANA e ka pasur në dorë, ku hetuesit e çështjes përshkruajnë hap pas hapi mënyrën e kapjes së tij në lagjen Mirador, në komunën Bello, rreth 20 kilometra larg vendit të krimit.

Për shembull, theksohet se Cabrera Azocar kishte veshur xhinse blu, një bluzë të zezë dhe mbante një çantë të zezë, të gjitha detaje identike me ato që policia kishte përshkruar përmes kamerave LPR të Bashkisë së Medelinit, teksa ndiqnin të dyshuarin për vrasjen.

Hetuesit gjithashtu përshkruan reagimin e të dyshuarit kur u ndalua nga policia në kryqëzimin e rrugës 53 me rrugën 65, në lagjen Mirador.

“Forcat policore e ndaluan këtë person duke e urdhëruar të zbriste nga motoçikleta, por ai nuk u bind dhe tentoi të nxirrte diçka nga rripi i pantallonave. Menjëherë, një nga policët nxori armën e tij të shërbimit dhe qëlloi dy herë, pasi ndjeu rrezik”, thuhet në raportin gjyqësor të bërë publik nga SEMANA.

“Më pas, i dyshuari tentoi të arratisej, por u përplas me disa automjete private dhe më pas u neutralizua,” vazhdon raporti.

Pasi u neutralizua, Cabrera Azocar u kontrollua nga policia dhe në çantën e tij u gjet arma, e cila u sekuestrua.

Disa banorë të zonës, që panë ngjarjen dhe u zemëruan për përplasjen që shkaktoi me disa automjete, tentuan ta linçonin, por policia nuk e lejoi këtë gjë dhe e transferoi atë në selinë e prokurorisë, në lagjen Caribe të Medelinit.

Aty doli në pah edhe informacioni që sot qarkullon në botën e nëndheshme të Medelinit, informacion tek i cili SEMANA ka qasje.

Për shembull, thuhet se Cabrera Azocar do paguhej 35.000 dollarë amerikanë (rreth 135 milionë peso kolumbianë) për vrasjen e Tushit dhe se kjo shumë do të ndahej mes katër personave që supozohet se morën pjesë në atentat.

Madje, është mësuar se edhe pse venezueliani kishte deklaruar se jetonte përballë kishës në lagjen Blanquizal, në komunën 13 të Medelinit, ardhja e tij në qytet dyshohet se ka ndodhur pasi doli nga burgu në Venezuelë vetëm për të kryer vrasjen e shqiptarit.

Në fakt, revista SEMANA ka zbuluar se në dosjen e tij kriminale, i arrestuari ka një dënim si i mitur, më 11 shkurt 2007, për një rast vjedhjeje të kryer në Venezuelë.

Gjithashtu, mësohet se në shtator të vitit 2014 ai u lirua nga burgu famëkeq “Tocorón”, ku kishte kryer një dënim gjashtëvjeçar për trafik droge.

Por dy vjet më vonë, në prill të vitit 2016, u mësua për një tjetër arrestim të Cabrera Azocar për rrëmbimin e një çifti më 29 mars 2016 në Karakas. Në atë kohë, ai ishte gjithashtu në kërkim për një vrasje, sipas autoriteteve.

Dhe edhe pse në Kolumbi ai nuk ka asnjë precedent penal, këtë të enjte drejtësia duhet të vendosë nëse do të pranojë kërkesën e prokurorisë — e cila kërkon ta dërgojë në burg — apo atë që i bëri të ditur revistës SEMANA avokatja e tij, që ai të qëndrojë në shtëpinë e tij në Blanquizal.

Sa i përket Artur Tushit, i cili kishte pasaportë ekuadoriane, vdekja e tij është raportuar gjerësisht nga mediat në Ekuador, Brazil, Itali dhe Shqipëri. Trupi i tij tashmë i është dorëzuar një agjencie funerale prestigjioze në qytet për t’u riatdhesuar.

Ndërsa për dyshimet mbi lidhjet e tij me grupe të trafikut të drogës, Policia e Medelinit i ka kërkuar informacion Interpolit për të përcaktuar nëse kjo është e vërtetë apo jo.

Vetëm në këtë mënyrë do të mund të zbulohet nëse ai ishte pjesë e mafieve shqiptare që kohët e fundit kryebashkiaku i Medelinit i ka akuzuar për përpjekjet për të marrë nën kontroll Parkun Lleras të qytetit.